Ti musika ituluyna ti agtugtog kadagiti naragsak a balbalse; dumanunda iti siledna dagiti katkatawa ken ti run run dagiti sarsarita; namin-ado nga immayabda iti ruangan ti siled ni amana, ni ikit Isabel, ni dunia Victorina, ni pay Linares, ngem ni María Clara saan a naggaraw: kasla anges ti agbugbugsot ti agruar iti barukongna.
Limmabas dagiti kanito; ti ragragsak iti panganan nagsardengdan, mangngeg ti panagsasalada, idi kuan, naibos ti kandela ket naiddep, ngem daydi balasang saan pay la a nagkir-ing, adda a sidadasay iti datar, ranraniagan dagiti sinsinamar ti bulan, iti sakaánan ti ladawan ti Iná ni Apo Jesús.
Nagin-inot a nagulimek ti balay, naiddep dagiti silsilaw; ni ikit Isabel immawag manen iti yan ti ruangan.
—¡Ala, nakaturog!—kinunana iti napigsa a timek;—gapo ta ubing ket awan pay la ti inna panpanunuten, maturog a kasla maysa a bangkay.
Idi awanen ti di nagulimek, ni María Clara bimmangon a siinayad ket inwarasna dagiti matmatana iti lawlawna, nakitana ti bansag, dagiti babassit a sapsapaw a kinalatkatan dagiti mulmula, a digusen ti naliday a lawag ti bulan.
—Natalna a kasakbayan!—¡Maturog a kasla maysa a bangkay!—indayamudumna iti nainayad a timek, ket napan iti bansag. Ti pagilian matmaturog; isuna la a mangngeg sagpaminsan ti danarudor ti maysa a lugan, nga aglasat iti rangtay a kayo iti rabaw ti karayan, a iti daydi waywayas ken natalna a danomna inna man aganninaw ti lawag ti bulan.
Daydi balasang intangadna dagiti matmatana sadi langit a kasta unay ti nakasinsin-aw a balbagna; inikkatna a sibabannayat dagiti singsing, ar-aritos, tudtudok ti buok ken ti sagaysayna, ket inna ida inkabil iti barikes ti bansag, ket kimmita iti karayan.
Maysa a bángka nga adda met a nailugan, ti nagsardeng iti sangladan nga adda iti tunggal balay iti igid ti karayan. Maysa kadagiti dua a lallaki a naglugan immuli iti agdan a bato, linayawna ti kabiti nga alad, ket kalpasan ti sumagmamano a darikmat, nangngegen dagiti padekpadekna nga umul-uli iti agdan ti bansag.
Ni María Clara nakitana a nagsardeng idi inna nailasin, ngem
toy apagbiit laeng, ta daydi lalaki immasideg a si-inayad, ket idi
