idi ti paggapuan ti panagbalinko a dakes a tao wenno ti innak
panangbaybay-a a patayendak gapo iti innak panagtungpal iti
maysa a napateg a sao. Ni Apo Mugna dina inpalubos, ta daydi
lakay a pangulo dagiti tutulisan natay ¡Maysa a bulan ti
limmabas ket itan, sabali ti panunotyon!
—Agpayso ti saóyo, Elías, ngem ti man tao ngamín, maysa a parsua a mayay-ayos; idi, sibubulsekak, siluluksawak, dammok ket di? Ita, ti dakes a innak napasamak lineksabna ti abbóng dagitoy matmatak; ti kinawaywayas ken dagiti rigrigat a linaklakamko iti pagbaludan, isuda ti nangisuro kaniak; ita, makitak ti nakaal-alingget a letteg a mangdadael itoy a Ili, iso a kimpet iti lasagna ket dumawat iti maminpinsan a inna pannakaikkat. ¡Isuda linuktanda dagiti matmatak, inpakitada kaniak ti sugat ket nilitendak nga agbalin a dakes a tao! Ket tangay kinayatda, agbalinakto a pilibustero, ngem pudpudno a pilibustero; ayabakto amin dagiti daksanggasat, amin dagiti makarikna iti uneg ti barukongda nga adda puso nga agpitpitik, dagidi nangibaón kadakay kaniak idi. . . ¡saan, saanakto a dakes a tao, uray kaanoman, sain a dakes, ngem naimbag ket di ti makidangadang gapo iti daga a nakayanakan! Datayo, iti bayat ti tallo gasot a tawen, intay kadakuada inggayat ti ima tayo, intay dimmawat kadakuada iti ayat, intay tinarigagayan ida a ninagan iti kabsat, dania ti inda insubad kadatayo? Indatay nagsasawan ken nagang-angawan; ket inda pay kadatay inpawil uray pay ti galad ti kinataó tayo. ¡Awan Dios, awan inanama, awan kinatao; awan sabali nga adda no di laeng ti kalintegan ti pigsa!
Ni Ibarra sipupungtot; amin ti bagina a mamigpigerger.
Limmabasda iti sango ti Palasio ti Jeneral ket inpagarupda nga ngkutkuti ken aggargaraw dagiti agbantay.
—¿Natakuatandan san ti itatalawyo?-indayamudom ni Elías. —Agiddakayo, apo, ta gaburankay iti ruot, ta lumabastayto iti asideg ti Polborista, ket ti sentinela mabalin a dillawenna ti kinaduatayo.
Daydi bángka, maysa kadagitay naingpis ken nailet a kinungkungan a kayo a saanda nga aglasat ngem lumiasda iti rabaw ti danom.
Kas inpakaunan ni Elías, ti sentinela inna pinasardeng ket
sinaludsudna no adinno ti naggapuanna.
