—Sadi Manila, napanak nangipan iti ruot kadagiti uk-ukom ken ku-kura, —insungbatna, a tinuladna ti ayóg dagiti taga Pandakan,
Maysa a sarjento ti rimuar ket inammukudna ti naaramid.
—¡Sulóng! -kinuna toy; —ibagak kenka a saanka nga umaw-awat iti iluganmo ita bángkam, uray siasinno; adda maysa a balod a nakatalaw. No matiliwmo ket yegmo kaniak, ikkankanto iti nasayaát a gungguna.
—Naimbag, apo; ania ti pagilasinan kenkuana?
—Nakalebita ket agsao iti sao ti kastila: ¡agannadka a!
Daydi bangka immadayo. Ni Elías intaliawna ti rupana ket nakitana ti sentinela a sitatakder iti igid.
—Madadaeltay iti sumagmamano a kanito, —kinunana a si-inayad; —rebbengtay ti sumbrek iti karayan Beata, tapno kas laák taga Penia-Pransia. Inkayto makita ti karayan a dinaniwan ni Francisco Baltasar.
Tilli matmaturog a lawagan ti bulan. Ni Crisóstomo timmakder a nangsiddaáw iti nalaos a talna ti Nakaparsuaán. Ti karayan, nailet, ket dagiti ig-igidna, a nasimpa, namulaánda iti ruot nga amgid.
Ni Elías intapuakna ti nagyan iti bangka inti igid ket nangala iti maysa a tekken ket nangaón iti babaen dagiti ruruot iti bayon nga awan nagyan. Intuluyda ti naglasat.
—Dakay ti akinkukua iti nakem ken iti kasakbayanyo, apo, —kinunana ken Crisóstomo, iso a siuulimek.— Ngem no ipalubusyo, kunak kuma kadakayo: Kitaenyo a nalaing ti inkay aramiden, inkay rubruban ti gubat, ta adda pirak ken uloyo, ket iti mabiit, inkayto makasarak iti ado a taktakiag, ta aduda dagiti malukluksaw. Ngem, iti daytoy bakal a inkay irugi, dagiti adadda nga into agsagaba, isudanto dagiti awanan sanggir ken awanan basol. Dagidi met la rikrikna a namilit kaniak itay napan a bulan a immay kadakayo nagdawat iti pannakabalbaliw ti agdama a kasasaád, isuda met la dagiti mangiduron kaniak ita nga agkuna kadakayo nga agpanunutkayo. Ti Ili, apo, saanna a mapanpanunot ti sumina iti Espania: awan sabali a dawatenna
no dila sangkabassit a wayawaya, linteg ken ayat. Surutendakayto dagiti malukluksaw, dagiti dakes a tattao, dagiti napukawanen iti inanama, ngem ti Ili saánto a rumaman. Marirukayo no
