Ni Elías nagtukeng ket nagpanunot. Ti igid, adayo pay laeng, ket iti mabiit, ma-abutto idan dagiti palpaltog dagiti adda iti barangay. Kinayatna ti nagsubli iti karayan Pasig: ti bangkana nakarkarting ngem ti barangay. ¡Ngem, dakes a gasat! maysa met a bangka ti aggapo iti Pasig, ket makitan a sumilsilap dagiti kapkapasete ken baybayoneta dagiti guardia sibil.
—¡Natiliwdatayon!—indayamudumna ket bimsag.
Kinitana dagiti nabaneg a taktakiagna ket idinto ta inna napanunot ti kakaisuna a natda a mabalinna nga aramiden, rinugyanna ti naggaód a inpakatna amin a pigsana a nagturong sadi Puro Talim. Iti daydi, sumingsingisingen ti init.
Ti bangka napardas ti panagliasna; ni Elías nakitana, iti rabaw ti barangay, a balbaliwanna met ti turungenna, dagiti sumagmamano a tattao a sitatakder a mangpaypayapay kenkuana.
—Ammuyo ti mangiturong iti maysa a bangka?—sinaludsudna ken Ibarra.
—Wen apay kadi?
—Gapo ta nalpastay a napukawen no diak tumapuak iti danom ket innak ida yaw-awan. Isuda indakto kamaten, nalaingak a lumangoy ken bumasat. yadayukto ida kadakayo, ket makaammukayon a mangispal iti biangyo.
—¡Saan, agbatikayo ta intay ida sarangten!
—Banbannog, awan igam tayo, ket kadagiti palpaltogda indatayto papatayen a kasla tumaytayab a babassit.
Iti daydi a kanito, adda nangngeg a chiss iti danom a kasła nagtinnag a banag a napudot, ket sinaruno a dagos ti uni ti paltog.
—¿Makitayo? —kinuna ni Elías, ket indissuna ti gaód it uneg ti bangka. —Agkitatayto no Nochebuena, iti yan ti tanem daydi apoyo a lakay, Ispalenyo ti biagyo!
—¿Ket dakayo?
—Ni Apo Mugna innak inispal kadagiti daddadakkel pay a pegpeggad.
Ni Elías inuksubna ti badona; maysa a bala ti naikkat kadagiti im-imana, ket dua nga uni ti paltog ti nangngeg. Di ket naan-ano, pinetpetanna ti ima ni Ibarra, iso a siidda iti uneg ti bangka; timmakder ket nagtapuak iti danom, a inna induron iti
sakana daydi bassit a bangka.
