—¿Awan panagtalek mon itoy padrinom?—sinaludsudna iti kasla ayog ti mangbabalaw;— ala, agtugawka ditoy, ket ibagam kaniak dagiti sagbabassit a paglukluksawam kas aramidmo idi ubingka pay a bassit, no dumawatka idi iti allid nga aramidem a sinantataó. Ammumon a kan kanayon a inay-ayatka... saanka nga inung-ungtan, uray kaanoman...
Ti timek ni Padre Dámaso saan a nagubsangen ket kasta unay naglailo ti ayogna nga agsao. Ni María Ciara nagsangit.
—Agsangitka, anakko, ¿ania ti pagsangitam? ¿Nagapakay ken Linares?
Ni María Clara inapputna dagiti laplapayagna.
—¡Awan kayatko a denggen maipanggep kenkuana ita!— inyikkis daydi balasang.
Ni Padre Dámaso inna kinita a napnuan sidda-aw.
¿—Dimo kayat a italek kaniak dagiti palpalimedmo? ¿Saanko aya nga inkagkagumaán a kanayon a tinungpal amin, uray
dagiti kababassitan a kinaykayatmo? Daydi balasang inkitana kenkuana dagiti matmatana namsek iti lua. pinerrengna iti nabayag bassit, sa nagsangit iti napait.
—¡Dika agsangsangit a kasta, anakko unay, ta dagita luluam indak dangran! lbagam kaniak dagiti tutuukem; ¡makitamto no kasano ti panagayat kenka toy padrinom!
Ni María Clara immasideg kenkuana a sibabannayat, nagparintumeng iti saka-ananna, sana ingngato nga inkita kenkuana ti rupana a nadigos iti lua. ket kinunana iti nainayad nga apaman la ta nangngegna:
—¿Ay-ayatendak pay met laeng?
—¡Anakko!
—No kasta, ngarod. . . ¡igagayo ni ama ket dikay patpatuluyen ti pannaki-asawak!
Ket ti balasang inna inbaga kenkuana daydi naudi a panagsaoda ken Ibarra, ngem inulimekna ti maipapan iti palimed ti pannakayanakna.
Ni Padre Dámaso apaman la ta namati iti nangngeganna.
—Idi sibibiag pay,—intuloy ti balasang,—rantak idi ti makidangadang, aguray, agtalek! Kayatko idi ti agbiag tapno
innak la mangngeg dagiti masasao gapo kenkuana... ngem
