ita ta pinataydan, ita, ¡awan gapo ti pagbibiagan ken pag-rigrigatakon!
Inna inbaga ti kasdi, a sibabannayat, si-inayad, sitatalna, saan a naglua.
—Ngem, ang-ang, saan a mamenribo a nalalaing ni Linares ngem ...?
—Idi adda pay a biag, nabalinko kuma ti naki-asawa... rantak idi ti agtalaw iti kalpasanna . . . ¡ni ama awan sabali a kalikagumanna no di laeng ti inna pannakikabagyan! Ita, ta nalpas a natayen, awan uray siasinno man ti mangnaganto kaniak nga asawana... Idi adda pay a biag, nabalinko pay kuma ti nagbalin a dakes, nabati kuma kaniak ti liwliwa a makaammo nga iso adda pay a biag ket nalablabit a innak met malaglagip; ita, ta nalpasen a natay . . . ti kombento wenno ti tanem.
Ti ayog daydi balasang nalaós piman a nagbileg, ta napukaw man ti ragsak iti rupa ni Padre Dámaso, ket nagpanunot.
—¿Napigsa unay aya ti ayatmo kenkuana?—sinaludsud na nga istay dina mabalikas dagiti sasaona.
Ni María Clara saan a simmungbat. Ni Fray Dámaso intamedna ti ulona iti barukongna ket nagulimek.
—¡Anakko unay! —kinunana, a timekna ti mapugsapugsat;— pakawanennak, ta pinagbalinka a daksanggasat, a diak ket am-ammo. Siak innak pinanpanunot ti kasakbayam, kinayatko nga agbiagka a nanam-ay, nagasat. Kasano kadi nga innak inpalubos a makiasawaka iti maysa a taga ditoy, ket diak kayat a makitaka nga agbalin nga asawa nga awanan nam-ay, ken ina a daksanggasatan? Saanko a nabalin a naikkat ita ulom ti ayatmo, uray inpakatko amin a pigsak a simmupiat; awan ti diak inaramid a labes gapo kenka, gapo laeng kenka. No kuman na-asawanaka, iti kalpasanna, inka kuma sangsangitan ti kasasád ni asawam, nga awan la ti dina pakaida- danesan, nga awan man ket mabalinna a pagsarapa; no nagbalinka kuma nga ina, inka kuma sangsangitan ti gasat dagiti annakmo: no inka ida paádalan, isaganam ida iti naliday a kasakbayan; agbalinda kuma a kabusor ti Relijión, ket inka
kuma ida makita a mabitay wenno maipanaw ditoy; no baybay-am ida a di masursuruan, inka kuma ida makita a matag-
