Sadi ngato, iti bakras ti bantay, iti sibay ti maysa nga ubbog, adda nga aglemlemmeng iti nagbabaetan dagiti kaykayo ti maysa nga abóng, a dagiti tedteddekna, puon ti kayo a killo-killo. Iti rabaw ti atepna a panaw, kimmalatkat a kasta unay rukbosna ti karabasa a nagulgulan kadagiti bungbunga ken sabsabong; iti uneg ti balay, ado dagiti naibitbitin a sarsara ti ugsa, bangngabangnga ti alingo, dagiti dadduma, atitiddag dagiti sasaóngda. Sadiay iso ti pagtaengan ti sangabubungan a tagalog, nga agan-anop ken mangaykayo.
Iti linóng ti maysa a kayo, daydi lakay agar-aramid iti sagad a i-it ti niog, adda met maysa a balasang a mangilaglaga kadagiti ip-iplog ti manok, daldalayap ken natnateng. Dua nga ubbing, maysa a lalaki ken maysa a babai, addada nga agay-ayam iti abay ti sabali nga ubing, a nabessag, naliday, dadakkel dagiti matmatana ket nauneg ti panagkitkitana, situ- tugaw iti puon ti kayo a natuang. Ti nakuttong a rupana, intayto bigbigen a iso ti anak ni Sisa, ni Basilio, a kabsat ni Crispín.
—Inton umimbag ta sakam,—kunkuna daydi ubing a babai kenkuana,—agay-ayamtayto iti linemmengan, siakto ti inina.
—Umaykanto kumuyog kadakami a sumang-at iti tuktok ti bantay, innayon met daydi ubing a lalaki,—uminumkanto iti dara ti ugsa a naperresan iti dalayap ket lumukmegkanto, ket isurukanto a lumagtulagto kadagiti batbato nga agpaparang ti murdongda iti karayan.
Ni Basilio umis-isem a sililiday, kitaenna ti sugat ti sakana, sana ikita dagiti matmatana iti init a kasta unay nagsayaát ti panagraniagna.
—Ilakom dagitoy sagsagad, —kinuna daydi lakay iti daydi
