dakes a napasamak ti naudi iso ti namaggayyem kadakuada),
ket iti met sabali a tawa, addada nga agtatamdag ni Sináng, ni
kasinsinna a Victoria ken ni nalibnos a Iday.
Ti bulan, agbanatabát iti Daya, mangrugi a tumangkayagen ket inna raniagan dagiti ul-ulep, kaykayo ken balbalay, a dagiti an-anniniwanda, atitiddag ket datdatlagda.
—Saan a bassit a gasatyo ti inkay pannakapalusot kadagitoy nga al-aldaw! —kinuna ni Kapitan Basilio ken Don Filipo; —pinuuranda dagiti pagpagbasaányo, wen, ngem dagiti dad- duma, ad-ado pay ti napukawda.
Maysa a babai ti immasideg iti tawa ket kimmita iti uneg ti balay. Dagiti matmatana nakasilsilapda ket ti rupana nakakutkuttong, ti buokna siwawakray ket kuso-kuso: ti bulan iso ti mangted iti datdatlag a langana.
—Ni Sisa! —kinuna a nasdaáwan ni Don Filipo, sana kinita ni Kapitan Basilio idi ta immadayo daydi agmauyong. —¿Di met adda aya idi iti balay ti maysa a mangngagas? —sinaludsudna; —naágasanen?
Ni Kapitan Basilio immisem iti napait.
—Ti mangngagas nagbuteng a idarumda a gayyem ni Don Crisóstomo, ket inna pinagtalaw. Ita, adda manen nga agwalang-walang, agmauyong a kas met la idi, agdandaniw, saan nga agaramid iti dakes ket agyan iti bakir . . .
—¿Aniada pay dagiti naár-aramid iti ili nanipod idi napanawanmi? Ammok nga adda baro a kura tayo ken baro nga alperes
—¡Nakakigkigtot daydi nga aldaw,dagiti tattao agsanudda!— indayamadom ni Kapitan Basilio, a panpanunutenna ti nalabes. —Kitaenyo, iti sumuno nga aldaw daydi pannakaitalawyo, nasarakanda a natay ti sakristan mayor, a naibitin iti bubungan ti balayna. Ni Padre Salvi linadingitna unay ti ipapatayna ket innalana amin a pappapelna. ¡A! ni pilósopo Tacio natay metten ket naitabon iti kampo-santo ti sánglay.
—Asi pay ni Don Anastasio! —inyasog ni Don Filipo;— ¿ket dagidi pagpagbasaanna?
—Pinuuran dagiti nasingpet a tattao, nga inpagarupda nga
iti kasdi nga aramidda, maayatan ida ti Dios. Awan nabalinko
