Ti babai nga agtatamdag iti tawa dengdenggenna a sipapasnek ti daniw ti agmauyong, ket inbilinna iti agbantay a soldado nga inna paulien.
Ni Sisa, idi makitana nga asitgan daydi soldado ken idi mangngegna ti timekna, nagtaray a sipupunno iti kigtot, ket amme ni Apo Mugna no kasano ti pegges ti panagtaray ti maysa nga agmauyong. Ni Basilio inna sinurot, ket iti butengna a dina masiputan, nagtaray met ket inna nalipatan ti sakit dagiti saksakana.
—Kitaenyo kad ti panangkamat dayta ubing iti daydiay agmauyong! —kinuna a nakapungtot ti maysa a babaunen a babai nga adda iti lansangan.
Ket idi makitana a dina la ingga-an a kamkamaten, pimmidot iti bato ket inbakalna kenkuana a kinunana:
—Ni! ¡ania ket ti pannakairananan a sigagalot ti aso! Ni Basilio nariknana nga adda nagdisso iti ulona, ngem intuluyna ti nagtaray a dina ket intaltalek. Dagiti as-aso inda taulan, dagiti ganganso agi-iriakda, addada tawtawa nga aglukat, a tamdagan dagiti nausisa, addada met agrikep gapo iti butengda nga adda man gulon.
Dimtengda iti ruar ti ili. Ni Sisa, rinugyanna nga inin-ina-yad ti panagtarayna; adayo ti namanawannan iti mangkamkamat kenkuana.
—Ina!— pinukkawanna idi inna nailasin.
Ti agmauyong, apaman a nangngegna ti timek, sinublianna manen ti nagtaray.
—¡Ina, siak! —inpukkaw daydi ubing, a napukawnan ti inanamana.
Ti agmauyong dina mangngegen, ti anakna sursurutenna a kasta unay ti angsabna. Nalabasandan dagiti minulmulaán, ket asidegdan iti bakir.
Ni Basilio, nakitana ni inana a simbrek iti bakir, ket simrek met. Dagiti lanlanot, dagiti kaykayo a babassit, dagiti sisiitan a ruruot ken dagiti agruruar a ramramot dagiti kaykayo isuda ti mangabbéng iti panagtarayda nga agpadpada. Daydi anak sursurutenna piman ti anniniwan ni inana, a pasaray lawagan dagiti sinsinamar ti bulan iti nagbabaetan dagiti kay-
