Ni Sisa nakitana ti muging ti anakna a nadigos iti dara; indumugna ti bagina kenkuana, dagiti matmatana kasda kayat ti lumsot, miningminganna ti rupana, ket daydi nabessag a langa winagwagna dagiti napaturog a ur-urat ti utekna; adda kasla maysa a rissik a rimmusing iti lagipna, nabigbigna ti anakna. nagikkis, ket napasag iti rabaw ti naidasay a bagi ti anakna, inna inarakop ket inna inagka-agkan.
Daydi ina ken daydi anak saanda a nakagaraw nga agpadpada...
Idi nagsubli ti rikna ni Basilio, nakitana ni inana nga awan angesnan. Inawaganna, binalikasna dagiti kasasam-itan a nagnagan, ket idi ta makitana a saanen a umanges ket di metten agkismay, timmakder, napan iti waig a nangala iti danom a inkabilna iti binalisungsong a bulong ti saba ket inna inwarsi iti rupa ni inana. Ngem daydi agmauyong saan a naggarawen. dagiti matmatana nagkanayunda a nagkidemen.
Ni Basilio, inna kinita a sikikigtot; indennana dagiti lapla payagna iti puso ni inana, ngem daydi nakuttong ken nalaylay a barukong nalamiisen ket daydi puso saan nga agpitiken: inpátayna dagiti bibbibigna kadagiti bibbibig ni Inana ket awanen nadlawna a sang-aw. Daydi daksanggasat inarakupna ti bangkay ket nagsangit iti napait unay.
Ti bulan nakaliblibnos ti panagraniagna sadi langit, ti puyupoy agkalkallautang nga agsensennaáy, ket iti babaen dagiti ruruot agdandaniw dagiti kurkuriat.
Daydi a rabii ti napalalo a lawag ken ragsak dagiti ado nga ububbing, a iti napudot a sidong ti balayda inda rambakan ti piesta a kasasam-itan kadagiti laglagip, ti piesta a manglagip iti daydi immuna nga ikikita a siaáyat ti langit iti daga; daydi a rabii, rabii a kadagiti amin a balbalay a kristiano inda agpapangan, aggiinom, agsasala, agdadaniw, agkakatawa, aggaáyam, agginnayan-ayat aggiinnagek... daydi a rabii, kadagiti il-ili nalamek, maysa a nakaskasdaaw unay kadagiti ububbing. agraman ti kayo ti saleng a magulgulan kadagiti silsilaw, sinantataó, kankankanen kada sinanbalbalitok, iso kitaen a mapurpurar dagiti nabukel a matmata a pakaisarmingan ti kinadalos, daydi a rabii, awan man sabali nga igayatna ken Basilio
