Agsipod ta aduda pay laeng dagiti adda a sibibiag kadagiti
intay nasarsarita, ket gapo pay met ta dimi nasurutanen ti nagpuk-pukawan dagiti dadduma, saan a mabalin ti mangaramid
iti maysa a pudpudno a panungpalan toy a sarita. Iti pagimbagan dagiti tattao, inkam kuma amin ida papatayen a si-aayal
manipod ken Padre Salvi ket agpatingga ken dunia Victorina,
ngem saan a mabalin... ¡agbiagda! tangay ti Ili, ket saan a datao, ti mamakpakan kadakuada...!
Nanipod idi simbrek ni María Clara iti konbento a napan nagmonja, ni Padre Dámaso tinalawannan ti ili ket napanen nagyan sadi Manila, a kas met ni Padre Salvi, iso nga inggana iti di makauray iti pagobispuanna, mamin-ado a mapan mangaskasaba iti simbaán ni Santa Clara, nga iti konbentona. adda napateg a takemna. Saan a napalabas ti ado a bulan, ni Padre Dámaso immawat iti bilin ti M. R. P. Probinsial a mapan agkura iti maysa a probinsia nga adayo unay. Saritaenda a napalalo a ladingitna iti kasdi, ta iti sumuno nga aldaw, nasarakanda a natay iti siledna. Addada nagkuna a natay, ta bimmukno ti dara iti ulona, dagiti dadduma kinunada met a natay a binatibat, ngem ti doktor inukasanna amin a duadua, ta pinalawagna a natay a naklaát.
Awan ngata kadagiti mangbasbasa kadakami ti makailasinen ken Kapitan Tiago, no inna makita. Idi linawas la engen ti bilangen sa sumbrek ni María Clara nga agmonja, nalausanna ti nagkapoy ti nakemna, ket nangrugi metten a nagkuttong ken nagliday iti napalalo, sipapanimmin a kanayon ket awanen pagtalkanna, kas ti daydi binay-anna a gayyem, ni daksanggasat a Kapitan Tinóng. Apaman a nagrikep dagiti ruruangan ti konbento, inbilinna iti daydi saan a maliwliwaán a kasinsinna, ni ikit Isabel, nga ummungenna amin a kukkukua daydi anakna ken daydi natay nga asawana, ket mapa-
