Rimmaniag manen ti maysa a kimat, ket maysa nga urat nga apoy ti nanglasat iti langit, ket adda nangngeg a nakabutbuteng a gurroud.
—¡Jesús! —kinunana, ket nagugis met.
Agpayso, ta iti naraniag a lawag ti kimat, adda nakitana a maysa a puraw a sangkabagi, nakatakder, iti asideg unay ti pakabayo ti atep, siwawayat sadi langit dagiti taktakiag ken til rupana, a kasla gumawgawawa. Ti langit inna man sungbatan kadagiti salsal-it ken gurgurruód!
Kalpasan ti gurruód, adda naállingag a naliday a senna-ay.
—¡Saan a ti angin dayta! ¡lso ti araria! —kinuna daydi soldado, a kasna insungbat iti panangitalmeg ti kaduana iti imana.
—¡Ay! ¡Ay!— kuna ti asog a manglasat iti tangatang, a inna pay apawan ti danapadap ti tudo; ti angin dina man kabaelan a ep-epen iti waneswesna daydi timek a nasam-it ken nakaay-ay-ay, napnuan iti kinaáwan a liwliwa.
Adda manen rimmaniag a kimat a kasta unay ti makapurar a lawagna.
—¡Saan, saan nga araria!— kinuna daydi “distingido";— ¡nakitak manen; nalibnos a kas ken Apo Santa María... ¡Intan, pumanawta ditoy, ta inta ipakaámmo!
Daydi soldado saanna a pinaulit ti awis, ket isuda a dua nagpukawda.
¿Siasinno daydiay agun-unnoy iti kaltaáng ti rabii, nupay agangin, agtudo, aggurród, agkimat ken agsal-it? ¿Asinno daydiay managbutbuteng a Birjen, asawa ni Apo Jesukristo, nga inna man sarangten dagiti napalusutan a taktakiag ti Namarsuaket inna pilien ti nakakigkigtot a rabii ken ti nawaya a langit, a panangiturong iti Apo kadagiti as-asógna, manipod iti napeggad a pantok? Binaybay-an ngatan aya ti Apo ti simbaanna iti uneg ti konbento ket dina timudenen dagiti karkararag? ¿Saan ngata nga ipalubos dagiti langit-langit ti konbento a dagiti ar-araráw ti kararua inda dumanon inggana iti nangato a tugaw ken saád ti Manangngaási Unay?
Ti dawel nganngani nagpatpatnag, a kasta unay rungsot ti yaáblatna; iti bayat ti rabii, awan rimmaniag a uray la no
maysa a bituen; dagiti naawananen iti inanama a sensenna-áy,
