X
TI ILI
Iti nganngani igid ti taaw a tamnay iso ti yan ti ili a San Diego,8 iti tengnga dagiti nalawa a kataltalunan ken pinagayan, adda tagapulot, bagas, kape ken bungbunga nga ilakuna kadagiti sabsabali nga il-ili, wenno itedna iti nalaka unay a pateg iti sanglay a manglaka iti kurang ti ammo wenno kadagiti dakes a kabkababalin dagiti agtaltalon.
No iti maysa nga aldaw a natalna ken nalawag ta dagiti ububbing umulida iti pantok ti pagkampanaan ti simbaan, a tamenan ti lumot ken sabsabali pay a mulmula nga agtubtubo, iso tay umkisda a napalalo ti ragsak, gapo iti kinasayaat ti maipabuya kadagiti matmatada. Iti let-ang ti nagtitipunan dagiti at-atep a nipa teja, galba ken labig, a sininasina dagiti inal-aladan a napunno kadagiti muymuyong ken sabsabong, tunggal maysa ammuna a sapulen ti bassit a balayna, ti bassit a umokna. Uray ania agbalin a tanda: maysa a kayo, ti salamagi a babassit dagiti bulbulongna, ti niog a nagulgulan iti bunga, a kas ken managbunga nga Astarte wenno ni Diana sadi Efeso nga ado dagiti sussuso na, maysa a kawayan a nalap-it, maysa a bua, maysa a krus. Sadiay iso ti yan ti karayan, kas maysa a dakkel a beklat a sarming, matmaturog iti naaplagan iti naganos; addada naibaktabaktaw a batbato a dadakkel iti kadaratan a pagayusanna, isuda a mangsangga iti ayosna; sadiay, ti pagayusanna agilet iti baet dagiti dua nga ig-igid a nangato, isuda a kinaptan nga agtirtiritir dagiti kaykayo nga agpaparang dagiti ramramotda; ditoy, agpababa iti bassibassit ket ti karayan lumawa ket agalina-ay. Sadiay, iti adayo, adda balay a bassit, napatakder iti igid, sarangtenna ti nangato, ti angin ken ti derraas, ket gapo kadagiti narapis a tedteddekna mabalin a makuna a maysa a dakkel a tumaytayab nga atiddag dagiti saksakana sa mangsisiim kadagiti aguy-uyas tapno inna ida sippiten. (8) Awan nasarakan rrri nga ili a kastoy ti nagan na, ngem aduda dagiti kapadpadana iti kasasaad. — Palawag Rizal.
— 70 —
