Idi isuna a rumuar daydi lakay, adda maysa a lugan a nagsardeng iti pagserkan iti daydi baetan, a kas la adayo ti naggapuanna: nakebbct iti tapok ket dagiti kabkabayo aglinglingetda.
Ni Ibarra dimsaag a sinaruno ti maysa a lakay a babaunen; pinagawidna ti lugan ket nagturong iti kampo-santo a si-u-ulimek ken sidedeggang.
—jTi panagsakitko ken dagiti ar-aramidko didak pinalubusan a nagsubli!—kinuna daydi lakay a sibubuteng;—ni Kapitan Tiago kinunana nga iso ti makaammo nga agpaaramid iti panteon; ngem minulaak kadagiti sabsabong ket nangikabilak pay iti maysa a krus a inaramidko.
Ni Ibarra saan a simmungbat.
—jSadiay, iti likod daydiay dakkel a krus, apo!—intuloy ti babaunen a intuduna ti maysa a suli idi makastrekda iti ruangan. Ni Ibarra kasta unay a pannakasdemna nga agpanpanunot, ta saanna a nadlaw ti siddaaw dagiti dadduma a tattao idi inda nabigbig, isuda a nagisardeng pay iti lualoda ket inda sinipsiputan a sipupunno iti gagar.
Daydi bumaro si-a-annad a magmagna, nga inna likliklikan ti pumayat iti rabaw dagiti tantanem a nalaka a mailasin gapo iti pannakailessebda. Idi kua, inna ida payat-payaten ita, inna ida pagraeman: ni amana adda met sadiayen a naipada a naidulin. Nagsardeng idi makadanon iti maysa a bangir ti krus ket kinitana amin a di mangan-ano. Daydi nanguyog kenkuana dina ammo ti kukuenna ket napaumel; agsapsapol iti tanda iti daga ket awan met makitana a krus.
—dDitoy? —idaydayamudumna; —Saan, sadiay, ngem nakali metten ti daga!
Ni Ibarra inna kitkitaen a silaladingit.
