Barbara. . .! nganang bubulung ning gobernadorcillo,
menimutla ya at saka ya mengurus.
Ginalapak ya i’Tasiu.
"Makabage ya pin kekayu ing lagyu na ning santa yung patulunan. " ngana king kastila, kaybat giluta'ne at linub ya king pisamban.
Kilub, ding munisilyus gagawan de ing metung a tumbang makapaligid kandilang makabili na karing tasakan dang dutung. Adwa lang mesang pitumpak da. Makabalut lang imalan a matuling at makipaligid a maputi. Keni't keta akakit mong makalarawan ding bungu.
"Karen lang kaladwa ryan o karen lang kandila...?" nganang kinutang.
Inyang ikit no ring adwang anak, ing metung maki apulung banwa pa mekad at itang metung, pitung banwa, pintala’no reti at e ne menayang pakibat karing munisilyus.
"E ko pa tuki kako, anak? I’inang yu sidya na kong manyaman a apunan, pamangan cura.”
"Ing mayul pu e na kepa buring muli,” nganing matwa karing anak. "Panayan ko pu ring kaupahan ku ba’kong ibye kang Inang mi."
"O nu ko munta kanyan. . .?"
"King kampanaryu pu. Baktingan miya ing kumpana para karing maldang kaladwa.”
"King kampanaryu. . .? Nung makanyan mimingat kayu at e ko kareng kumapa neng babagyu.”
Lalwa'nong mipnung lunus ding adwang anak a papanik king koru at saka ne linwal king pisamban.
Kisuta'nong Tasiu ding mata na, tinalanga ya banwa at ngana king sarili na:
"Ngeni, e ku pa panayan ing kildap at duldul..
Linakad yang makaduku at linwal ya king kabalenan.
"Salangi ko pamu...”ngana king kastila ning siwalang menibatan king metung a yawang.
Minatna ya ing filosofo at ikit neng makatiman ing metung a lalaking ati’nang atlung pulu o atlung pulu’t limang banwa twa.
