"Galang naman inukul da mung ating Purgatorio dapot alang maki balu king tunc ping aten ...?" ngana ning tininti.
"O dale! Dapot ing asabi ku kekayu ating maki balu kaniti at tune ing ating Purgatorio. Metung ne kareti i'Zarathustra o Zoroastro a sinulat king mapila'nang dake ning Avesta at mitatag yang metung a pamanyalpantaya (religion), kasalpantayanan a makitulad bagya king kekatamu. I’Zarathustra, agpang karing matenakan, mebye yang ating walung dalan a banwa uling ayun kang Gaffarel, kaybat nong linusu ring kapasyagan da ri Platon, Xanto de Lidia, Plinio, Hermipos at Eudoxo, binalak neng adwang libu limang dalan a banwa kauna king panaun tamu. Nanu man ing sabyan ta kaniti, dapot ya ing tutu king i’Zarathustra kanita pa ati’neng sasabyan a katulad ning Purgatorio at yusuk na no man ding paralan nung makananu kang miligtas kaniti. Ding mabye malyari rong angwan ding kaladwa ra ding mete atyu king kasalanan king kapamilata'ning pamangadi karing mapila’nang bilungan ning Avesta, king pamanyapat mayap, dapot king pitayan a ing mangadi kaylangan kamaganak ne ning mete, agyang marayu nang marayu. Iti daraptan da banwa-banwa king lub ning limang aldo. King kelambatan, inyang meniwala ne ing balen king relihyun a iti, atuklas ding pari king iting kasalpantayanan agawa reng kapanintunan a pakinabangnan. Semantalanan da itang sinabi nang Zarathustrang ing Purgatorio ya ing sukulan a malalam at madalumdum a nung nu la daralan kasakitan ding kaladwa ra ding mete mikasala. Inya ing kaladwang mebaldug karin nung pabanwa mu ing pibata'nang pamagkasakit, kabud pamamayad nang metung a derem, (kwaltang malati mu alaga) mayangu ne ketang kasakitan. Dapot anti ning ketang relihyun a ita ating kasalanan a miparusan manibat king 300 anggang 1,000 banwa, anti mo ing pamaglaram, ing pamamirait, ing e pamanupad king amanung pangaku at aliwa pa, ding pusakal a pari mekapamulsa lang yutayutang derem. Kanyan akit yung wawangis ne ita kanyang Purgatorio tamu, bista man atin lang é pamilupa ring myayaliwang relihyun.
King uli ning mataram a kildap a tikya'ning memaksing a duldul, mipatikdo ya’t mengurus i'Doray.
