“Ah!, nung ati'ta na sa keta bale, kang Inang...”
nganang dinaing ning malati kang koya na. "Karin é
ku tatakut.”
E mekibat ing maragul. Lalawa'neng ditak-ditak malalaso itang kandila at mimisip yang malalam.
“Karin alang sumabing menako ku. E na payntulutan Inang! Nung abalu nang berug daku...”
Ing maragul kelingwa'ne ing kandilang lalwa'na, kinet neng matirik ing lubid a tatalna’na at saka ne sepulyut masikan. Meramdam kanita ing matning kalingking ning kumpana.
“Makanyan ta namu kabang bye, koya...?” ing sindu nang kutang Crispin. “Bukas sana misalunan ku ba'kung manatili bale. Misalunan ku sang malwat bana kung lingapan Inang at é na naku payntulutan magbalik pa king kumbintu! Kanita é ra naku awsan mapanako, é ra naku barugan ! Ika man, koya, dapat kang misalunan anti aku.”
“Ali!” nganing koya. "Mangamate ta ngan : i’Inang king sukal lub at ika ta king danup.”
I’Crispin e mekibat.
"Magkanu ing saluran mu king bulan a iti?” ngana kaybat ning mapilan a penandit.
“Adwa nang pesus. Pepagmultan dakung mekatatlu...”
“Nung makanyan bayaran mu no pamu ring sasabyan dang penako ku, kanita é ra na kata awsan mapanako. Bayaran mu la, koya, ane?”
“Mamulang ka, Crispin? U nanung kana'nang Inang? Sabi ning Mayul adwa lang onzang gintu ding penako mu, at ing alaga ra deta atlung pulu't adwang pesus.”
Ing malati minilang ya karing taliri na anggang o ya miras king katlung pulu’t adwa.
“Apat a gamat at adwang taliri. Pesus balang ta liri,” nganang bulung-bulung mimisip. "At bala roong pesus pilan yang kwartus?”
“Dinalan anam a pulu. . .”
“Dinalan anam a pulung kwartos...? Dinalan anain a pulung ukdu balang metung a kwarto. Indu ko! At magkanu la ring dinalan anam a pulu?”
