Dulum ya ing bengi. Ding memalen tahimik lang paynawa. Ding sapning mekaganaka karing mete ra masaya nong matudtud tiling pengadyan da neng mekatatlung ukdu ing rosaryo angga requiem, ing nobena para karing kaladwa at sinalaing nong dakal a kandila arap ding banal a santus. Ding mabandi at makikagiwan depatan da na naman ing katungkulan a yutus na karela ning matas dang kabilyan. Tutuking aldo dungutan da ing atlung misang ganapan da ring atlung pari at munye la pang adwa para king metung pang misa at sali la namang bula a babye dakal a kapatawaran karing mete. Kanyan, balamu ing pamanatul ning Dyos (Justicia divina) e binang maigpit anti mo ing pamanatul ding tau (Justicia Humana).
Dapot ing kalulu, ing taung balen a manintunan at ing panakita'na halus é man managyu king kabyaya’na, king pamanyuhul karing mangatungkulan, karing empleadu at sundalus, ba’reng é alinlanganan king payapa nang pamibyebye, yang kalulung yan é ya matudtud maimbing anti mo ing buri rang papaniwala kekatamu ring maganakang taladalit a marahil é pa minukuk king mapait nang caliz ning kalukan. Ing maluka matamle ya at parating mimisip. Nung sakali man ketang benging ita é ya mengading makaba dapot ing pangadi na taimtim at banal inya karing mata na makabakas ing lugma at ing pusu na tatangis yang e bubulad. E ya mag-nobena, é ne balu ing kirie eleyson at ora pro nobis, é na la naman balu ring dalit a banal, at ing oremus a pikudta ring pari para karetang é mimisip king sarili ra at alang sariling panamdam. E na kaylangan yan ning pakakalulu uling é na naman
ayntindyan. Ngening manalangin ya ring mapait nang
