mepilit nang belayun ing pamagmunisilyus nang Basilio.
At ing asawa naman e ne bubulad.
Ketang benging ita, inyang ati'nang a las diez y media o a las once, inyang ding batwin mipanusiga’nong memanando ketang banwang tiguta’na na ning bagyu, makalukluk ya i’Sisa king metung a bankung dutung at pagumasda'nang mitatau ing paglatang a tengab na king kalang. Makapatung ya king kalang ing metung a kuran a pitutunan nasi. Ing parilyang magdalang atlung tuyu makasayad neman king baya. Menangnang no ring tuyung seli nang atlu balang adwang kwartu.
Makasalukbaba ya at pagumasda’na ing aping dilo ning kwayan a maging abu kaybat nang meging baya sinaguli. Mamyalungan ketang lupa na ing malungkut a timan. Aganaka ne ing bugtung a pepaluruk na kayang Crispin inggil king kuran at api:
Linukluk ya ing Matuling, king malutu metusuk ya
At inyang menasakit ya, memwangit ya at megalsa. . .
Anak ya mu at makikilalang ketang panau’na malagu ya’t masamyu. Detang mata na’t kaladwang pepamana na karing adwa nang anak, malagu la pa. Makaba ya irap at makawili yang maglalawe. Matilus ya arung at ding maputla nang labi larawan lang manamuyut. Ing yaus da kaya ring tagalug “kayumangging kaligatan”, ngara wari komanggi yang malinis at alang samut. Dapot ketang kayanaka’na, pauli na mekad ning kasakitan o ning danup, migmula neng menakmul a pisngi at itang bwak nang malabung a meging maula nang panagawla ning kayang pangababai, ngeni man makaayus ya pa e uli ning magpakalagu ya nune gawi na na. Makasanggul yang alang sipit, alang sukle.
Pila'nang aldo e ya titipa. Tinanggap yang tayan a pamiraplan da. Ba’yang manakitan, pibata nang e sinimba itang abak a ita. Nung simba ya king balen at muli ya bale, manugse yang adwang oras, inya pibata na na ing e sinimba. Ing kakalulwan yutus na kang mikasala...! Kayari ning teyi nang imalan pengakwana’nya mung bayaran ning makibandi.
Pepatingapun nang tinaptinapan ing tulang kamtan na ketang kabengyan a ita. Abalu nang muli la ring
