Ing kalaw mekatadwa ne tinulauk king gubat ibat inyang tinuknang ing uran dapot ding anak na ala lu pa. Binili no kilub ning kuran ding tuyu ba’lang é dimla. Mine ya lele nang eran ning kayang dampa ba’nong sirawan king dalan. Ba'yang milibang dili na, dinalit yang malale. Atin yang malambing a siwala at ngening daralit yang kundiman king daramdaman ding anak na, deti mipapatangis la at alang maki balu nung baket. Dapot ketang benging ita gagalgal ya siwala at ding nota ning dalit matamad lang lulwal. Tiknang na ing dalit at linawe nang maratna ing dalumdum. Ing daramdama’na ita mung angin a manugse king danum a metipun karing mangalapad dang bulung ding sagin.
King makanya'nang pangabili, bigla yang linto arapa'na ing asung matuling. Ing asu atin yang guguyud king dalan. E na balu nung nanu ya. King takut na dimput ne ing kapirasung batu at pinukul ne ing asu. Iti milai ya at migbitaul.
I’Sisa é ya sana mapaniwala (supersticiosa) dapot dakal ne dimdam king awsan dang waga ning mapalyari (presentimientos) at karing asung matuling, nung inya mengaligkig ya king takut. Bigla neng sera ing pasbul at linukluk ya siping ning sulu. Ing dulum ning bengi yang masikan manamuyut king myayaliwang bage makatakut, at king kaysipa'na mibait la ring anino makapangalimgiman a pipaid-paid ning angin. Bisa ya sanang mangadi, king Virgen, king Dyos, ba’rong ampunan ding anak na, lalu na ing malati, i'Crispin. E na belayun ing ibug nang mangadi ba'yang milako pamigaganaka at lerawa’no king kaukula’na ba'nang akit ketang penandit a ita ing e kukupas nang timan ning balang metung karela, itang timan a tatangala’na makagising laman o matudtud. Dapot bigla yang mengilabut, menalakad a bwak at mengamulagat: tagimpan man o katutwan, akakit neng makatalakad arap na i’Crispin, lele ning pagkalangan da, karin ketang lugal a nung mine madalas pakisabyan. Ngeni é ya bubulad dapot lalwa'ne karetang mangaragul at mapanisip nang mata kabang titimana’ne.
“Inang, ibusni me ing pasbul, ibusni me, Inang...!" nganing siwala nang Basilio ibat kilwal.
Mengilabut ya i'Sisa at itang anino limbug ya.
