ding babai sapak lang pale... ding karing lalaki, anti
murin... ding anak, makanyan mu naman... Ali, Inang,
e ku na atatandanan pa itang aliwa...!”
E na ne pinilit Sisa, e ya rin maniwala king paninap.
“Inang, atin ku pung linutas ngening benging iti..." nganang Basilio kaybat nang menahimik sinaguli.
“Nanung linutas mu...?” ing kitang na.
I’Sisa mababa ya lub, angga na karing anak na. Ukula’nang migit la balu kesa kaya.
“E ku na pu buri ing munisilyus...!"
“At bakit. . .?”
' Pakiramdaman yu pu ing inisip ku. Ngening aldo iti dinatang yang ibat España ing anak nang Don Rafael a paniwalan kung mayap mu namang katulad ning pengari na. Ngeni pu, bukas kwanan yu ne i’Crispin king kumbintu, pakikwa yu na la mu ring sweldu ku at pakisabi yu namung lakwan ku na ing munisilyus. Kabud kumayap ku, pakikitan ke i’Don Crisostomo at ipakisabi ku kayang tanggapa’na naku sanang maging pastul ding baka na't damulag. Agyu ku ita uling maragul na ku. I’Crispin naman malyari yang magaral keta kang matwang Tasiu. Ya maganaka ya at e mamarug, bista man iti e na paniwalan ning cura. Nanu pa mong pitakutan tamu king pari? Makasagid ta na king kakalulwan at nanu pa ing arapat na ba'tang lalung makalulu. . .? Paniwalan yu ku, Inang, ing matwa mayap ya. Aku, e mu misan, ikit ku ne king pisamban neng alang tau. Mangadi yang makasiklod, maniwala kayu! Inya aku, Inang, e na ku pu bisang munisilyus. Dita’kamu panakitan at ding kapurit mung panakitan mumuli la pa king multa! Ding sabla makanyan ngan ing daraing da. Maging pastul ku, at nung lingapan kong mayap ding pabante ra kaku alang kapilisyan, alugura'naku ning maki bandi. Malyari pang payntulutan daka tamung gumatas karing baka ba’tang makainum pang gatas. I’Crispin buri nang tutu ing gatas. Ninung maki balu! Pota galang digalwan da ko pang bakang malati nung akit da kung masalese magserbisyo ... Sesen ta ya at pataban anti mo yang manuk tang gaindu. Managtal kung prutas king marangle
