at saka ko pisali king balen, yabe ko pa ring gule ning
mula tamu, e kasi mika kwalta ko pa... Gawa kung
parate at silu ba'kung makarakap ayup at pusang labuyu,
mamadwas ku king ilug, at potang dagul na kung
bagya mamaril ku pa kareng pulu tamu. Malyari ku
namang mangutud dutung ba kung pisali o iregalu king
maki bandi at kaniti alang sala tumula ya. Potang
malyari na kung sarul makisabi kung mapilan a balitang
king gabu'na ba'kung sarulan at tamnan atbu, o kaya
mais at kanita, Inang, e na ko manaing anggang
kapitangan bengi. Balang pista atin tang bayung imalan
at makayulam tang babi, baka at asan a mangaragul.
Aku naman mye kung timawa, mikakit tamu aldoldo at
makapisulu tang mamangan. At anti ning i’apung
Tasiu sasabya’nang matni ya buntuk i’Crispin papagaral
ta ya Menila. Akung makibat king kaylanga’na kabang
manintunan ku. E tuto, Inang...? At malyaring
magdoktor ya pa. Ngayu paya...?”
“Ngaku paya...? Itang buri mu, ing ana’ko...!” nganang mekibat at saka ne kinaul matalik.
Atimalad nang ketang tangka ning anak na e ya makabilang i’Tata na inya kinyak yang e bubulad.
I’Basilio tutu yang panatag a lub ketang sablang mumunikala na uling ketang bubut nang pamisip ala ya pang akakit nune mu itang buri rang akit ding mata na. Kang Sisa malagu itang kapagnasa’nang Basilio inya king balang sinabi na tatangu ya. Dapot ing tundu belika'neng inuyung myuman king duya'na i’Basilio kabang i’Ole-Lukoie a simbitla nang Andersen karing salita na, lidlad na neman kaya itang masigla nang payung a mipnung larawan a mangasanting.
Atagimpa’nang pastul ne mo at kayabe ne ing wali na. Managta'lang byabas, alpay at aliwa pang bungang tanaman king pulu. Lipat-lipat la karing sanga, maliksing anti mong mariposa. Lulub la karing lukib at kikilap lang akakit da ring batu kilub. Mandilu la karing malino sibul at ing balas balamu gintu at ding bulig makilupa no man karing iyas a makabili king Corona ning Virgen. Ding mangalating asan daralit la't sasagakgak. Ding tanaman duruku la sanga at kareting sanga magyuyu no man ding kwalta at prutas. Menakit yang metung a kumpanang makabitin king metung a dutung at makabang lubid a panigtig king kumpana.
