Ati'nang las siete ning abak inyang i’Fray Salvi ayari ne ing katlu nang misa. Atlu ing misang inari na kilub ning metung a oras.
“Masakit ya ing pari,” ngara ding kosyang. “Ala ing sadya nang iring at liksi.” Likas na ing gani nang pigmisa at e sinabi kataya man, e ya miglalawe at e ya menatu.
“Mimingat kayu!” ngarang misisitsitan ding munisilyus. “Makabarena ya mu, at van king uli ra ding adwang mikapatad...!”
Likwa'ne ing sacristia at menik ya babo ning tuknanga’na. Disa’nong manayang pakalukluk karing bangku king pasilyu ning sala ring pitu o walung kosyang a babai at ing metung a lalaking balik-balik papasyal. Inyang akit de tinalakad la at ing metung a babai migpauna ya ba'ya sanang mumang gamat dapot ing pari kimpasa'na nya mu at mipatuknang ya.
“Mekad kebatinga’ne namang metung a real ing kuriput..nganang tiniman maki sunu, pauli ning e na masanting a pangatanggap king cura. "E naku mo pepauman gamat, aku pa naman, akung manibala king kapataran ding kosyang (Hernandad) aku. . . ing kapatad a Rufa. ..! Ngeni pa milyari kaku ing makanyan...!”
“Ngening abak e ya man linukluk king pipagkumpisalan...” nganang tinuglung ning kapatad a Sisa, ing matwang alang ipan. “Bisa ku pa namang magkumpisal ba’kung makinabang at ba'kung akamtan ing ganap a kapatawaran (indulgencias plenarias) at iparikil
ku ngan king kaladwa na ning mete kung asawa.”
