“E masanting ita, kapatad a Juana!” nganang
Rufa, ing e mekasiklod gamat. "Ita mung metung
karing ganap a kapatawaran a tinggap mu labis neng
panatbus ketang kaladwa na king Purgatorio. E mo dapat
sayangan ding banal a kapatawaran (indulgencias).
Apusan mu ku.”
“O ngaku mo sana, nung sosobra lalung mayap!” nganang makatiman ning kapatad a Juana. “Anta mo ikayu makananu yung daraptan . . .?”
Ing kapatad a Rufa e ya agad mekibat. Menyawad ya pamung kapirasung luyus, lengut ne, at saka no linawe ring tahimik makiramdam kaya, linura ya king metung a suluk at nganang migmula kabang lalangut yang tabaku:
“Aku e ke sayangan agyang metung yang aldo banal. Menibat ketang mekyabe ku king kapataran (Hernandad) mekatipu'na kung 456 lubus o ganap a kapatawaran, (indulgencias plenarias) 760, 598 banwang e lubus a kapatawaran (indulgencias). Aba, lilista ku ing sablang nanabangnan kung kapatawaran uling buri ku ing malinis a kwenta. E ku nasa ing mamirait dapot e naku man bisang mapirait!” Ing kapatad a Rufa pepaynawa yang bagya dapot sulung mu rin ing langut na king tabaku’t luyus. Ding babai lalon deng makapamulala dapot ing lalaki tiknang na ing lakad na at nganang mapagmatas kaya:
“Makanyan mo. . .? O aku lub na mu ning pabanwa mekatipun kung apat a lubus a kapatawaran (indulgencias plenarias) migit king atipun yu, kapatad a Rufa, at labis ku pang dinalan a banwa, bagu e ku man makaing mengadi kanyan . . “Migit kako . . .? Migit king 689 kung ganap a kapatawaran, 994, 856 a banwa . . .?” nganang buysit kinutang ning kapatad a Rufa.
“Yan ing tutu. Migit kung walang ganap a kapatawaran kekayu at dinalan pang banwa, at iti lub na mu ning mapilan bulan," nganang minulit ning lalaking maki rosaryu at mengulapung kalmin a pakabitin king batal na.
“E pagmulalan . . .” nganang pepasambut Rufa. Ikayu naman ing guru at ing pekapun king lalawiga!”
Mituran ya buri ing lalaki inya tiniman ya.
