taid mi lang kola at anti ke mong e kesiran.”
Kaniti, ala neng atutul pa ing kapatad a Rufa.
"Ipayntulut yung ikutang ku kekayu ining metung kung kapikakunwan...?" nganang malamarine kinutang ning dalagang Juana. "Ikayu, Ginang, kamalayan yu nang lubus ing bage-bage tungkul king Gloria, Purgatorio at Infierno... Aku, ipagtapat ku ala kung balu kanyan.”
"Sabyan mu ing kapikakunwan mu...?”
"Madalas kung ababasa karing novena at aliwang aklat iting kapanabilinan : Atlung padre nuestro, atlung ave maria at atlung gloria patris...„"
"O ngeni...?”
"Buri kung abalu nung makananu lang pangadyan : atlung padre-nuestro-ng mitutuki, atlung ave maria at at atlung gloria-patris a mitutuki mu naman?”
"Makanyan pin, atlung ukdung padre-nuestro. . "
"Ipanupaya yu, kapatad a Sipa. .." nganang sinalabat Rufa. "E la makanyan pangadyan. Sukat lang ikalilwa ring lalaki karing babai. Ding padre-nuestro lalaki la at ding ave maria, babai la, kabang ding glorias ila naman ding anak.”
"Ay! ipanupaya yu, kapatad a Rufa. Ding padre nuestro, ave maria at gloria, mengari la mo king nasi, ulam at salsa a pamangan da ring santu.”
"Magkamali kayu! Alben yu, ikong mangading makanyan, e yu tanggapan ing adwan yu!" "At ikayu naman, nung makanyan yong pangadyan, ala kong akwa kareng novena yu!” nganang mekibat matwang Sipa.
"Nanu ngamo...?” nganang tinalakad Rufa. "Kapilan pa mu kebatingan kung metung a bigak. Menalangin ku kang San Antonio at ikit ke. Apisali ke pang mal. Ika pala!”
"Ah, makanyan ...? Inya pala sasabya’na ning siping yung bale pisali ye ing bigak na!”
"Ako...? Aba, ing alang marine... Inta baket kalupa mu ku wari...?"
Memilatan ya ing guru ba'lang mipayapa. Mekalingwa’no ring padre-nuestro at ding babi ila nang pisabi ra.
