Metung yang sidwan a maki labing limang metrus a kaba at maki walu anggang apulung metrus king lapad. Ding dalig na pinintan lang albearding maputi at mitmu lang ginulis a larawan a matsura at manawang at maki pamansag lang e manayun. King metung a suluk, masalese lang makasalasan ding mayapulung lumang pusil a kasamut da ring mengalawang a sabli, tandus at talibung. Deti ila mong sandata ra ding pulisbalen (cuadrilleros).
Nangan karin ning sala a panagawlan da ring marinat at malutung kortina, makasabit yang makapampan ing larawa’ning Ari Espana at lalam na niti makapatung king tumpakan dutung makabili neman ing maragul dapot luma nang luklukan a s ira-sira na takde at arap ning tabureting iti ating malapad a mesang mimusingan king mengaugse tinta at mitmung dukit lasetas a kalupa ra ding mesa karing tindahan alak ning Alemanya a nung nu la magdatun ding magaral. Bangku at sirang tabureti, den ila mu ring kasangkapan.
Iti ya ing sidwan ning munisipyu a nung nu la mipupulung ding mangatungkulan, ken da la naman darala ring miparusan at aliwa pang bage. Ken, karin la ngeni mipapagsalita ring mangatungkulan king balen at ding karing baryu. Ing lupung ding makatwa e ya makyabe king lupung ding kayanakan, uling deng adwang lupung a ren milalaban lang milalaban: ing lupung ding matwa king sadyang palakad at ing lupung ding kayanakan a bisang manibayu naman. Ing pamilaban da reti tutung maigpit at miraras na angga ketang e sukat.
"E ku buri ing darapta'na ning gobernadorcillo," nganang Don Filipo karing kakalugura'na. "Ya ing pa
