"Makamal, aku yapag ku ing alagang ukulan kung kaylangan king katatagan,” nganang Don Filipo.
"E mi tanggapan...!"nganing metung a matwang tisiku at matalik a kalaban.
"Salangsang kami...!” ngara ring aliwang matwa.
"Gino...nganang Don Filipo, kabang agwanta’na ing ayli na. "E ku pa sinabi man ing munikalang dela mi keti ring lupa kung kayanakan, sasalangsangan yu ne. Ing maulagang munikalang ini, abibitasa ming pamayapan de ring sabla migit king nanu mang munikala ra o imunikala pa ring kalaban mi.”
King pamamitasa nang iting Don Filipo, lalu lang mikapali buntuk ding mangatwa inya reti pisumpanan da ngan ing sanggalang la. Nganang tinuglung Don Filipo :
“Atin tamung makasadyang P3,500 a gugulan. Kareng alagang den maka-pagpista ta nang maragul at masiglang labis at labis, pamagmasusing e pa meakit kapilan man keti kekatamu o karing karatig a lalawigan.”
"Hus...!” ngara ring e maniwala. “Ing balen A atin yang 5,000; ing balen B naman, 4,000...! Ka yabangan!"
"Pakiramdaman yu ku, Gino, ba’kong maniwala..." nganang minulit Don Filipo. “Mumungkahi kung mitalakad tamung entabladu libutad ning patyu king alagang P150.”
"E la managyu, iras yong Pl60. .” nganang tinutul ning metung a matwang kalaban.
"Ilista yu, ginung Direktor, P200 para king entabladu,” nganang Don Filipo. "Palage tang pitung benging moru-moru, karing manibat Tondu. Pitung bengi, P200 balang bengi, e kasi Pl,400? Ilista yu, ginung Direktor!”
Ding matwa't kayanakan mengasdan la. Deta mung maki balu king lihim ilang e bubulad.
"Payalbe tamu mu namang fuegos artijiciales. Ilako ta no pamu reng mangalating lusis at rueda, uling den karen lang anak at dalaga. Ilele ta no pamu ren. Ikami buri mi bombang mangaragul at kwitis higanti. Adwang dalan a bomba tidwang pesus balang metung
