tinalakad ing anak a cabeza de barangay at minyawad
yang amanu.
"Ipanupaya na ku sa ning kamalan yu nung kening kayanakan kung ini mangangas kung magsalita arapan da ring kagalanggalang a taung anti mo ikayu, taung king uli ning idad, kabyasnan talinting at tumimbang king matulid, uling king sikanan kung lub a ini menguyabnan ku mu ketang gingkas ning magiting manalumpati, Capitan Basilio, at ita sanang matalino nang amanu ya nang gawan kung kalasag kening letyan ku...”
Ding matwang kalaban da mipaldan lang mekaramdam.
"Ing anak a yan byasa yang magsalita! Mapakumbaba ya! Magaling yang mangatuliran..” ngarang mibubulungan.
"Sayang na . . . kulang ya kumpas !” nganang Capitan Basilio. "Mayayakit king e ne pegaralan i'Ciceron at anak ya pa.”
"Nung myapag kung tyuntyunan o munikala, ala king kaysipan ku, Gino, king iti ganap ya king kayapan at agad ye mong tanggapan. Nais kung ipakilala anti mu rin, ing paylalam ku king kaburyan ding sabla, at ipawatig ku karing mangatwa king ikeng kayanakan sasangguni mi mu naman ing pamibalak mi king karela pablasang tatanggapan mi itang mangatimbang nang pepawatig Capitan Basilio. .
"Isulung mu...! Isulung mu...!” ngarang matula ring mangatwa. V Capitan Basilio sisinyala’ne ing magsalita at tuturu na nung makananu nong yaregla ring bitis na at ikumpas ding takde na. Ing gobernadorcillo ya mu kabud ing maratun a bili dapot e mu balu nung e na pansing ing mapipisabi o atin yang aliwang isipan. Mesikan ya lub ing anak a cabeza de barangay inya nganang tinuglung: "Ing munikala ku, Ginu, metung mu ing pake na. Palto tamung pyalben a e karaniwan, itang e ra sadyang akakit, at pagpilitan tamung ding kwaltang malikum e la sana lulwal king balen at e ta la durulukan ding kabaldugan, salapi karing fuegos artificiales a alang ban keta malyari no mang magamit king aliwang bage kaylangan ding sabla . . .”
