Inyang ati'ne king dalan memirapal yang linakad pauli keta karela, alang panyu king buntuk, makasalbag a bwak at matulid a lawe king makarayu. Ing aldo mikakaluku ya king pali at alang metung mu mang lulam a papampan king aslag nang makapabilug; ing angin pakimuta’nong makakalale ring bulung dutung, ing dalan halus malangi ne; metung mu mang ayup alang bisang matig king lilung da ring sanga.
I’Sisa miras ya rin king malati nang bale. Menik ya, alang bulad, tahimik; tiluga’ne kilub, linwal ya, linakad king misusumangid. Kaybat milayi ya king bale nang matwang Tasio, minaus ya king pasbul, dapot ing matwa ala ya karin. Itang pakakalulu migbalik ya king kayang bale at migmulang mamaus gugulisak: Basilio! Crispin! at tutuknang ya’t matingid makiramdam. Ing kablas yulit na ing kayang siwala; ing banayad a kaluskus ning danum king makalapit a ilug, ing lawiwi ring bulung kwayan ila mu ring mararamdam ketang karatunan. Minaus yang pepasibayu, minukyat ya king metung a katasan, migbaba king metung a balisbis, kinuldas ya king ilug; ding mata na linguslingus la king anyung makapangilabut, kikislap la mamisanmisan king malusuk a tindag, kaybat lalabug la anti mo ing banwa ning benging babagyu; malyaring sabyan king ing pamisip magundap-undap at malapit nang mapda.
Pasibayu yang menik king kayang bale, migtalpak king dane nung nu la migkera king benging milabas, tinas no ring mata na at ikit ne ing kapirasu ning kamisa nang Basilio king sepu ning metung a kwayan ning dingding a makabanda king libis. Tinikdo ya, inabut ne at sinyasat king sala ning aldo: iting kapirasu atin yang bakas a daya. Dapot i'Sisa mekad é no apansing, pablasang tinipa ya at sindu neng sisisyatan lalam nitang manyuluk a sala, at layu'neng tatas; at anti mong dimdam nang meralumdum at makukulang ing sala, linawe neng matulid ing aldo karing matang alang kurap makadilat.
Sindu na pa ing pamaglakad keni at karin, gugulisak o kukulyo king siwalang é karaniwan; mika takut ya ing damdam kaya: ing siwala na mika bayung kalingking a é na sadyang papalwal ning batal tau. Busal na ning bengi, nung kapilan ing bagyu bibyung at ing angin mamalimpuyut king é mu nanung seluswan,
