"Inya damusakan yong matimid ding sumpal ken tulid ding babai, ba’nong e atulak ning danum...! "Dyos ku po . . . Maria Santisima ...! Lulub na ing danum...!” nganang sinyo ning metung a matwang mebasa saya.
Mika aliswas mu ring bagya. Ati'nang gugulisak, ati’nang bisang lundag king danum.
"Nu karin...? Nu karin.. .? Dyos ko. . .! E mi la akakit. E ko malunos...? Nu karin. ..? Ba't e ko lumapit . . .?” ngara ring babaing gagalgal king takut.
Linipat la ring limang bayntau ba’lang tahimik ding matwang babai. Metung a pamikatagun! Balamu pin king tulid ning balang metung a dalaga ating panganib, i'lbarra atyu siping nang Maria Clara, i'Albinu siping nang Victoria at ding aliwa anti mu rin, atin lang kasiping kabang king lugal ding matwa kabutil mang busbus ala! Mitahimik pasibayu king lugal ding mangatwa dapot e king lugal ding kayanakan.
Anti ning maratun ing danum, at ing lugal a pidadadalan asan e marayu, anggang maranun pa, pigampa ra ing magalmusal pamu at ilele la ring bagse. Pitda ro ding parul uling sasala na.
"Ala nang anti ing salabat neng abak bayu ka simba. . .” nganang Capitana Tika, ing pengari ning masayang Sinang. "Yulam me ing putu keng salabat, Albino, damdaman mu mika gana kang malaus mangadi.”
"Ya pin pu ing daraptan ku at balamu bisa ku pang magkumpisal...,” ngana. "Ali, kape ing inuman mu at akit mu mika diwa ka pa...!” nganang Sinang.
"Ngeni mu rin, uling balamu pin atin kung lumbe...”
"Ay! ali, tsa ing inuman mu at mulam kang galyetas, akit mu mitahimik ka kaysipan anti mo ing sasabyan da...,” nganang Tya Isabel.
"Opu, minum ku namang tsa at mulam kung galyetas. ..nganing mapanusig a mag-pari. "Salamat na mu isanu man kaniti makayaliwa king Catolicismo...!"
"O kanini, malyari ka pa...?” ing kutang nang Victoria.
