“Ali ya. Itang lawe na tutu mung malungkut. Misan man e ke ikit tiniman nanding abak..." nganang Maria Clara.
Makanyan yang milabas ing gatpanapun at dinatang ing penandit ning pamagbalik king balen.
Linwal la king pulu inyang ume nang silim at delanan deng tahimik ing au'na ning pipunpuna’nang Ibarra. Kalabas da karin, pepasibayu ing masiglang satsatan lalam da retang sangang dutung a e sadyang makaramdam king inge anti kanita. Magmalun la wari ding dutung at ding kukulate tanaman magyuyu la karing tangke, anti ra waring sasabyan: “Adios, kayanakan! Adios, paninap mung patingapon. . .!” Pabustan ta lang magsaya ngening mumuli no ring kayanakan magdalang milalablab a sulung-bulu at daralit king kalingking ding gitara. Ditak-ditak mababawas la, ding sulung-bulu tunggal-tunggal matatda la at ing tabil ding gitara mimina pauli ning ing balang metung sasalangi katulid ning tuknanga’na. "Ngeni, kayanakan, isulud meng pasibayu ing takap mung lupa uling migbalik na kang myuman karing kalupa mu. . .!”
