"Sinukul de itang alang kalma?” nganang sinabat ning matwang mipnu king kaung makabalu.
“I Elias ing amanwan yo? Makananu yung abalu?”
“Ikit ke ing Musa ning Guardia Civil.”
"Ing Musa ning Guardia Civil! At ninu ing Musang yan?”
"Ing asawa ning alferez, a e yu inanyahan king kekong pista. Napung abak mikalat king balen ing milyari king dapu. Ing Musa ning Guardia Civil atin yang matalas a pamanaluking anti mo ing kayang dewakan, at binalak nang ing piloto malyaring ya ing matapang a miyugse king asawa na king labak at ya ing menumbuk kang Padre Damaso; at anti na ning ya babasa’no ring sumbung a dapat nang tanggapan ning kayang asawa, a karatang-datang pamu, malasing at e na balu ing darapta'na, ban makapamali ya kekayu, inutusa’ne ing sarhentu kambe ring sundalus ban gulwan da ing sayahan king kekong pista. Mimingat kayu! I'Eva mayap yang babaing ibat karing gamat ning Dyos... I'Donya Consolacion sasabyan da marok ya at e ra balu nung nu ya menibatan! Ing babai ban magin mayap ya kaylangan ing misan mu man meging malinis yang dalaga o indu.”
Tiniman yang bagya i’lbarra at mekibat kakwang mapilan papil king kayang pataka.
"Itang meangubye ibpa ku maralas na kong kukutnan king myayaliwang bage at atatandanan kung matula yang bina king sarili na pauli ning tikya’no ring kekong usuk. Atin kung malating tangkang pagnasan kung abitasa pamagtagumpe.” At i'lbarra selese nang malagwa kaya ing tangka na dikil king eskwelang inampang na king kayang kapalsinta, at lidlad no arapa’ning magmulalang matwa ring planong dinatang ibat Menila.
"Pagnasan ku sana king ikayu usukan yu ku nung ninu ring taung sukat kung pakikaluguran muna ban ing tangka ku lubus magtagumpe. Ikayu balu yong mayap ding tau ning balen; aku bayu ku pamung datang at anti ku mong dayuhan king balen ku.”
Ing matwang Tasio sinyasat nong maglwa mata ring planong atyu king arapa’na.
“Ing kekayung malyaring arapat ya ing kakung tagimpan, ing paninap na ning metung a kalulung ma-
