Libutad ning mesa makabili ya ing metung a pinyang gewa ra mu (artificial) at kaniti makatasak la ring palitung ipan a makinis a gewa ra ring makasukul neng ala lang daraptan. Ati'nang tabas abaniku, tabas bulaklak, ayup, tangke sampaga, bulung tanaman o talikala a menibat mu king metung a yadle dutung. Ing ginawa kareti tau yang mepilit mu, ing kasangkapan a ginamit na kutsilyu yang mapurul at ing diwa na manibat king mabagsik a magbange. Mingatba niting pinyang maki palitu, ati’no man ding adwang bubug a lulanan karing makabuntun a dalanghita, dalandan, lansonis, anatis, tsiku at mangga bista'man Nobyembri Karing mangalapad namang bandehadu, makasapin pa pil a dinukit at pinintan masiglang kule, makabili mg hamun ibat Europa, hamun ibat China, metung a pastil a maragul katabas ning malating tupa anti mo ing Agnus Dei, mekad o kaya metung a pati-pati anti mo ing Espiritu Santo naman. Ating relyenung pabu, at aliwa pa. Pilatan deti, atin namang atsara a maki sarisaring bikas a megawa king sampagang luyus at aliwang gule at pruta, mangasanting a pangagili at pekat arnibal karing lulanan a garapun.
Melinis la ring sulung bubug a simamanan, ibat karing pengari at melakwan karing anak, kinintab la ring panagawlang tangsu, ring suluging gas milako la karing malutu rang balutan a meging kalasag laban karing lango at yamuk lub ning pabanwa uling nung ali e no bitasa mang magamit. Ding bibito kristal sulu papaid no ning angin at king pamisumpangan da makaramdam kang maynang musika at balamu wari magsaya la naman king pista uling itang sinag a kakalal da karing dalig a maputi magdala king kule ning pinanhari. Ding anak myalung la, magsaya la at tatagalan da ing lilibad a kislap ding bubug. Mangatakid la’t makasirang kasangkapan dapot iti e meging ambangan king siglang mimiral king pista. Nung e mu pista e la mipayntulutan ketang galo rang ita.
Anto mo ring pakamalan dang sulugi. lulwal la naman karing pisisinupan da ring gewa na ning dalaga — belung megawa king crochet, mangalating alfombra, sampagang artificial, ding bandehang maki pintang malating dayatan a nung nu la mamyalungan mo ring malating asan, dapu, susii, parus-parus, tanaman-dagat, at batung makintab. Deting bandeha atin lang tabaku,
