"Aba!” nganing mayling kapatas, “nung kapilan miraragdag ing akakit dang pamagkasipit tamu lalu ra katang pagmulalan . . .! Ing sabla kanita mika maragul a kabaldugan at sabyan da pa ring manakit: kasikan dang magobra! At saka yu na akit nung nanu ya klasing derrick ing italakad ku! At saka ke adornwan bandila at sabitanan mangulate tanaman a maki bulaklak! Kanita yu pa sabyan ing makalma kayu uling tinggap yu kung metung karing magobra yu at ing Ginung Ibarra man ala neng asabi!”
Meyli ya kaybat. I'Mang Juan man mayli ya at pipiling ne ing buntuk na.
E marayu karin makatalakad la ring adwang tarundung a mayayakit mitataid uli ning metung da mung bubungan a tikpan bulung-sagin. Ing guru ning eskwela at mayatlung-pulung anak gagawa lang korona at papakat do ring bandilang papil karing mangalating posting kwayan a makabalut imalan a maputi.
"Pakaingatan yung ding kulit (letra) masalese la pangasulat!” ngana karing mamintura. "Datang ya ing Alcalde, daka’lang curang tumagun, at mekad ing Capitan General man datang ya uling atyu keti king lalawigan ! Puryan da kayu nung akit dang byasa kong maminta.” "At malyaring regalwan da kong metung a pisara, ne po . . .?” "Mapalyari! dapot ing Ginung Ibarra menabili’ neng metung karin Menila. Bukas dakal ing mapilan a bage ibye ra kekayu anti mong galal. Ibabad yo reng sampaga at bukas ta no igawang tangke. Magdala ko pang dakal a bulaklak, katmwan ta ya ing mesa ba’yang malagung mayakit.” “I'Tatang ku magdala yang water lili bukas ampon metung a salikap a sampagita.” "I’Tata ku minakit yang atlung garetang balas at e ya pepabayad.. "O i’bapa ku ya ing mamayad king sweldu na ning metung a mestru. ..nganing pangunaka'nang Capitan Basilio. King kamatutwanan kaniting munikala sinaup la ngan. Ing cura inawad nang yang maging tegawan at mamindisyun king mumunang batung mitalakad at ing
