King kapistan ing sabla masaya at alang kulang nanu man ban miganap ing tula mi ikeng kastila at pikabalwan king anti kanining katatagan e ke makapangawat at iti pepakit mi king terak, king dalitan at aliwa pang mangalating bage a makapawi king nanu mang lungkut at metupad ya itang kasebyan a nung nu la karin ding agyang atlu mung kastila e malyaring manatili ing lungkut. Mika terakan karing dakal a bale ning matikding milionariong pilipinu a nung nu ke ngan meanyayang mangan. E ku na sukat pang sambitlan king ing milalu karakal at e karaniwan a pamangan a sidya na, mipangalalwan king degulan itang katatagan king kasal a merapat Cana (Ing kasal a sasabya’ ning Banal a Kasulatan) o Camacho (Ing kasal a e melaus king nobelang Don Quijote. Dakal a pamangan at maragul a gastus dapot mesayang mu.) dapot ini makayaliwa at lalung dakal. Kabang mamangan kami king manganyaman a linutu na ning kusineru ning La Campana, titigtig la ring orkesta mangalambis a musika. Ing lusuk king legwan a dalaga ning balen makagani yang pilipina at mitmu yang brilyanti at anti mo ing sadya, ya ing reina ning kapistan. Ikami ngan panamdaman ming sagid king kaladwa ing e miya ikwang aterak pauli ning mepaltuk ya ing lelikan nang bitis uling nung suryan mu ing sabla nang pamikakatawan ing dalaga ning sapning Santos anti ya mong metung a nimfa.
Ing Alcalde ning Lalawigan dinatang ya ba’ nang parangalan ing pamagmasusi kabukasan. Pigkalungkuta'na ing pangasaluna’na ning balitang pagalo-gabun (propietario) ing Ginung Ibarra, dapot agpang king balita mayap ne ngeni.
Mika limbun ngening bengi dapot iti ipamalita ku na king sulat ku bukas keka uling subali king makatulig at makapangaklak a bomba ring fuegos artificiales, mapagal ku at mitutundu na kung tutu. Uli niti, kabang paynawa kung makahilig karing takde nang Morfeo (dyos ning tudtud) o king katri ning kumbintu, papatad ku keka, matikdi kung kakaluguran, ing mayap a bengi at angga bukas, ing aldo ning maragul a katatagan.
