Ume neng mamunag ing aldo at ding bandang musikus lilibutan de ing kabalenan ba’rong gisingan king masigla rang tigtigan, ding memalen a mepagal. Ing diwa at ing sigla pasibayung mimiral, ding kampana magdupikal lang myuman, at ing pakbungan migmulang maranun.
Iti ya ing katatawlya’nang aldo ning pamagmasusi, ing kapistan. Dakal pa ing e ta ikit a mipamisan king aldo iti, migit king pepalage ra napun. Ding Hermanos ning banal a Kapisanan Venerable Orden Tercera, daka’lang migit kesa karing Hermanos ning Kapisanan Santisimo Rosario at ding makayanib king kapisanan at ita pagmatulan dang bina ing bage iti uling kanyan mipakarine la ring kayanib ning kapisanan a kalaban da. Labis la karakal ding seli rang kandila at kaniti anti la mong migpista mu naman ding intsik a magtinda kareti inya aukul da nang malaus ing pabinyag la e uli ning kasalpantayanan nune ba'lang makapak yasawang pilipina. Dapot king kapagnasan dang iti ding intsik ngarang makibat naman ding babaing banal:
“Nung mayakit king ding dakal a intsik myagnanagnan lang pabinyag balamu maging metung a milagru at nung makyasawa la, ila nang bala ring babai ba’rong gawan tune kristyanu.”
Ding memalen sinulud da ing peka-masanting dang gani at linage la king sinupan da ring sablang alahas. Agyang ding sugarul sinulud da ing kamisa iang mangasanting at burdadu at maki butunis mangaragul a brilyanti, ding mangabayat a kadenang gintu milage la at ding mangamal a kupyang maputi misulud la. Bu kud mung ing matwang pilosopo ing e mibayu aske. Ing kamisa nang siname a maki gulis a matuling, makabu-
