Misusumangid mitmu ya karing tau ing kamarin a gewa rang pisasamban king Miglalang king sabla.
Misasaksakan la, mitutulakan at mititimiran ding atyu kilub ning pisamban, karing taung lulub at lulwal a mangisnawang saldak. Marayu la pa makagong no ring gamat ba’rong itiltil ding karelang taliri king agua bendita dapot potang saksak la ring dakal a tau mirayu la ring gamat. Kanita damdaman mu lang mibungil, damdaman mo ring babaing meramusak, dapot susulung mu rin ing tulakan. Ding mapilan a matwang mekatiltil na ketang danum a ita, a kule nang burak a pipanwasan da na ring memalen pati na ring dayuhan, ketang danum a ita karin la mangurus king mitmung kabanalan, bista man magkakasakit la, king kanwan; king malingmingan, king arung, king salu, king batal, king pusad, king pisngi, pauli ning kapaniwalan dang uli na niti detang dake ning katawan a kirusan da e la malyaring sakit a buntuk, sumyas a batal, mika tisis o kaya e malaso pengan. Ding kayanakan, pauli na nitang alang dakal a sasakit karela o e la maniwala king dapat a anti kanita, halus e la man mababasa puntang taliri at iti ba'la mung alang sabyan ding kosyang at kanwari mo mangurus la king kanwan. Malyaring ating dalagang sumabing benditadu ka pin sana dapot itang danum a ita karinat na naman!
Halus e ka mipangisnawa, tutung malisangan at sisingo ing baung tau. Dapot e bala uli na ning paring manaral a ing balen binayad nang adwang dalan limang pulung pesus. Ing matwang Tasio ngana:
“Adwang dalan limang pulung pesus king metung mung aral! Katau ya mu at king misan mung ukdu! Katlu ya mung dake ing bayad da ring kumidyantis a
