Kaybat ding panasbuk at ning makuyad a pamagtahimik, inatyat neng makabaldugan ing gamat nang wanan nangan king altar makatangad ding panlalawe king Alkalde; kaybat makakalale nong pikurus ding gamat é minyabi kataya mang amanu, dapot ibat keting katahimikan kinimut ya’t bigla neng inandik king gulut ing buntuk, tiru ne ing pasbul a maragul king biglang asiwas ning takde a inukul ding munisilyus metung a utus at kebat do ring pasbul; ing alperes meliswas ya’t migaganaka nung mako ó manatili, dapot ing manaral migmula neng minyabi king siwalang masikan, mabilug at mainge: masala ing sadya nang manese byasa ya king pamanulu.
"Makislap ya’t maningning ing altar, malwalas ya ing pasbul a maragul, ing angin ya ing magdala king banal a amanung lulwal king kakung asbuk, pakirandaman yu karing balugbug ning kaladwa at ning pusu ban ding amanu ning Dyos é la manabu king gabun a mabalas at tuktukan da la ring ayup ning impyerno, nune tumubu kayu at dagul anti mong banal a punla king gabu’ning kekatamung kagalanggalang at nuan a igpang San Francisco! Ikayu, mangaragul a palpikasala, bihag ding morus ning kaladwa, a misnang karakal karing dayatmalat ning alananggang bye karing mayupayang daung ning laman at ning yatu, ikayung maka' tali karing talikala ning kayatwan ampon pamagimbut at mamagse karing saken ning demonyong Satan, lawan yeng mitmung kagalangan at pamanisi karin ing talapagligtas ding kaladwa king pangabihag da king demonyo, ing matapang a Gedeón, ing masikan a David, ing mapagtagumpe Roldan ning kristyanismo, ing gwardya sibil ning banwa, matapang karing sablang gwardya sibil ngeni at angga mang kapilan "—(ing alperes kiluru’no ring kile na)—” wa, ginung Alperes, matapang at masikan lalu, alang pusil nune mu ing metung krus a dutung, lupiga’neng lubus ing alang anggang tulisa’ning keralumduman ampon ding s?blang kampung nang Luzbel at tampunga’nong alang kapupusan nung é mu ing ding espiritu ala lang kamatayan! Iting pagmumulalan a lelanga’ning Dyos, iting e mu nanung kayapan ya ing maligayang Diego de Alcala, a ngening gumamit ku king pamakiadlayan, uling iti sasaup king pangataluse ring bage é matataluse, anti mo ing sinabi ning aliwa, sasabyan ku king iting maragul a banal dilidili ya mu at mababang ka-
