"Aaah! aaah!” nganang mekapanyabi bandang tawli ning misnang kasbung pari, temimi ring gamat at pipiling ing buntuk; king uli na nyan panaralan da ko keti king kabiluga'ning abak, mangarok a aral! Keti king bale na ning Dyos mipapate kayu at manyabing marok, alang marine! Aaaah! ala na kong gagalang...! Iti ya ing pasari na ning dewakan at ning kealan paina migil ning panaun! Ya na mg sasabyan ku aah!”
At dikil keting bage sindu na pang menaral kilub na ning kapitnang eras. Ing Alkalde malakak ya, i'Maria Clara mamatukba ya: itang kalulu é na alabanan ing tundu, ala neng pintura o larawan a timalaran ni ala neng apaglimbang king sarili. Kang Ibarra é no tatalab ding amanu, ni ring patanid; isipa'na ne ing metung a bale malati babo ning metung a bunduk at akakit ne i’Marfa Clara king hardin. Lalam, king kapatagan, paburen la ring taung gumapang king kakalulwan ding balen da !
Ing Padre Salvi pepatigtig ne mekatadwa ing kampanilya, dapot iti pepalablaba’na mu ing api: ing Pray Damaso mesyas ya buntuk, lalu neng kinaba ing aral. Ing Pray Sibyla kinet no ring labi na at inayus pilan ukdu ring salami’nang maki talanan gintu : ing Pray Manuel Martin ya mu ing lupang matulang makirandam, pablasang makatiman ya.
King katatawlyan, "ganap na,” ngana ning Dyos. ing manaral mepagal ya at kinuldas king pulpito.
Ding sabla siniklaud la ban pasalamat king Dyos. Ing Alkalde kisuta'no ring kayang mata, inatyat ne ing metung a gamat anti mong gigisinga’na ing sarili, bignus ne ing metung ah! at saka ya menuyab. Ing misa sinulung.
Inyang i’Balbino at i’Chananay kakanta re ing Incarnatus est, ding sabla siniklaud la at ding pari diku ro ding buntuk, ing metung a lalaki sinitsit na king balugbug nang Ibarra: "Potang penandit na na ning bendisyun king patalakad yu. é ko darayu king kura, e ko kukuldas kulkul, é ko lalapit king batu, uling mapanganib karin ing bye yu !"
I'Ibarra atuglapa'ne i’Elias a kaybat minyabi kaniti mewala ya busal ding makapal a tau.
