panaun. Deting lubid a bakal ilang mipapanik at
mikukuldas at kapakibat na la ning metung pang polea
kalupa na dagul a makatali king bitis ning makina at
deti lilikas da la king silindru ning metung a tornu a
mamantinyan da king gabun ding dutung a mangakapal.
Ing tornung iti a malyari mung palakaran at pakimutan
king kapamilatan da ring adwang talanan
migit la sikanan king metung a tau king pangimut da
ring adwang dulang a maki ipan at nung e man masalusu
dapot masikan naman.
"Lon yu,” ngana ning taung dilo a padurut king tornu. "Aku mu malyari keng itas at ikuldas ing maragul a batu king kayap na pangalapat niti, malyari keng itas tunggal ditak d ikuldas nung inya sa agyang katau ya mu itang atyu keta lalam e ya magkasakit milapat karing adwang batu at kabang akung palakad ati'ku keni.”
I’Ñor Juan mangapamulala ya ketang taung magsalita kaya. Ding manalbe mibubulungan la at pupuryan de itang lalaking dilo.
"Ninung mituru kekayu keng makinang yan?” nganang kinutang Ñor Juan.
"Ing pengari kung lalaki, ing pengari kung mete na," nganang mekibat makatiman king é karaniwa' nang timan.
"O king pengari yu, ninu namang mituru?”
"I'Don Saturnino, ing apu nang Don Crisostomo.
"E ku balung i'Don Saturnino . . .’ ’
"Oh! i’Don Saturnino dakal ya balu ! E mu bukud babaruga'nong mayap at bibilad ding talapagobra na nune balu nong gisingan detang matudtud at patudturan naman detang makagising. Akit yu rin ing tiru na kaku ning pengari ku, akit yu rin!"
At ing lalaking dilo titiman ya dapot king metung a timan a makapagmulala.
Babo ning metung a mesang makatakap king imalan a ibat Persia makatumpak ya ing metung a tingkaputing mabilug a lulanan (cilindro) at ing myayaliwang bage misikap kilub da retang adwang batu king metung a kahun a makapal a kristal a nung nu ya milulan ing katandanan king metung a panaun at misikap para karing tutuki ing katandanan karing milabas.
