Mayayari ne king pamiblas na i’lbarra inyang linub ya
ing metung a utusan at pepabalu nang ating
metung a magbubukid a mangutang kaya.
Inukul nang metung ya karing magobra na king marangle inya ngana king paluban de ketang tanggapa'na a magagamit mu naman king pamanyangkap nang panulu.
Dapot mipamulala ya inyang akit ne ing mabagsik at mahimalang Elias.
“Linigtas yu ing bye ku,” ngana niti king amanung tagalug inyang akilala na ing kimut nang Ibarra. "Mekabayad na kung kapitna king utang ku kekayu at ala na kong sukat pang pasalamatan kaku nanu man, nune aku pa ing sukat kilala. Mine ku keti ba’kung manyawad lub a mayap kekayu . . .’
"Sabyan yu”..., nganang Ibarra king tagalug mu naman kabang pagumasda'ne ing magbubukid ketang panaske nang e karaniwan.
Linawe neng maratnang Elias i’lbarra, kaybat ngana:
"Potang ing hustisya ding tau buri nang amasala ing lihim a iti, pakisabi kung e yu sasabyan kenu man itang kapaningatan a binye ku kekayu king pisamban."
"E ko migaganaka,” nganang maki mwang mekibat ning bayntau. "Balu kung darakpan da kayu dapot aku e ra ko ipabalu.”
"Oh! ita e king uli ku, ali e king uli ku,” nganang maki diwa at maki ketasan mekibat Elias. "Ita king uli yu. Aku ala kung katakutan nanu man karing tau.” Lalung miragdag ing pamagmulala nang Ibarra.
