Karin, lalam nitang makagayak a dalundung, misulusulu lang mamangan ding tatalan matas a katungkulan ning lalawigan.
King metung nang kabesera ning lamesa karin ya makalukluk ing alkalde. King kabesera kasumangid i’lbarra. King banda nang wanan i'Maria Clara at king kayli na ing eskribano. I’Kapitan Tiago, ing alperes, ing gobernadorsilyo, ding prayli, ding empleadu at ding mapilan a dalaga a mitagan, linukluk lang é agpang king tungkul a tatalnan da nune nung nu la bisa.
Ing pamisulusulu masigla at mipnung diwa dapot kalibudta’ning pamangan, dinatang ya ing karteru at panintuna'ne i’Kapitan Tiago. Magdala yang telegrama. I’Kapitan Tiago menyawad yang kapayntulutan ba' neng basan at ding sabla minayun la.
Ing marangal a Kapitan kiluru’no pamu ring kile na, kaybat milagat no ring mata na. Menimutla ya, kaybat mibawi ya. Mamalagwa neng tiklip ing telegrama at dapal yang tinikdo.
"Ginu,” nganang meliswas, “ing kamala’na, mg Kapitan Heneral datang ya ngening gatpanapun at parangala’ne ing pibalebale ku...!
At kaybat milai yang darala ne ing telegrama at ing serbilyeta dapot kelingwa’ne ing kupya na. Tikya’ne ning myayaliwang kutang at pamagmulala dapot é ya mekibat.
Agyang mibalita pang datang la ring tulisan é la maliswas at mangapamulalang kalupa ning milyari king balita dikil king pamunta ning Kapitan Heneral king bale nang Kapitan Tiago.
"Manaya na kayo...? Kapilan ya datang? Sabyan
