"Dumayu kayu...!" nganang miuman ginulisak babala. "Baket? Tatakut kong dungisan ke ing gamat ku king dayang e malines ? E ku sinabing ing pusu ku panatag yang titibok? Dumayu ko kekami! Makirandam kayu, pekakatawa'ning Dyos, ukum a pakilalang matas a uri kesa karing aliwang tau at papaniwalang maki makapaibabo upaya! Ing pengari ku metung yang taung marangal, ikutang yu kanyang balen a gagalang king lagyu na. Ing pengari ku mayap yang memalen. Pepaypagkasakit ya king uli ku at king ikakayap ning balya'na. Ing bale na makabuklat ya pasbul karing sabla, ing dulang na makasadya ya karing dayuhan at kaninu mang hamak a lalapit kaya. Mayap yang kristyanu, kapilan man darapat yang mayap at kapilan man é no inalipit ding mayna at e no pepatangisan ding magkakasakit. .. Kanini, biklat no ring pasbul ning pibalebale na, mekisulu ya king mesa na ar inaus neng kakaluguran. Nanu ing inabias na? Siplung neng alang katutwan, inalinlang neng alang patanat, dinina'nong sandata ding butang laban kaya at yang gewa nang kasangkapan ing kabanala'ning kayang panga-pari, lepastangana'ne ing kayang kutkutan, inumis na ing mapuri nang lagyu at tekikya'neng inalinlangan angga na king karatuna'ning kamataya’na! At é pa managyu kaya iti. . . ngeni naman. ing anak na ya ing kayang nais sintangan. Aku penginlagan ke, lilisya ku ba'kong é mitagpu. Ikayu dimdam yeng lepastangana’na ing pulpitu nanding abak, lerawa’nakung é mayap karing malda dapot é ku bubulad. Ngeni dinatang ya keti ban keta manakit yang paralan ba'nakung sugatan a panamdam. Mibata kung e bubulad at kaniti balu kung magmulala kayu. Dapot pilkara’neng pasibayu ing banal diling lagyu para karing sablang anak. Ikayu, ikong anggang atyu keti, pari, ukum, ikit yu ne ing matwa yung pengari ngening magobra ya’t magpuyat king uli yu at kaybat mikawani ko kaya ban magdulap kasngawan at potang ati'nako king aliwang labwad, yang pengari yung yan miugse ya king sukulan magdilidiling babantya'ning pagmalun at mangisnawang saldak ba'nakong akaul mu man, manintun, mamaus metung a kataung makaibye ditak mu mang kaligayan ketang pamangulila na at pangasalun á midala kaya king makalunus nang kamatayan...? At kaybat damdaman ye pang maumis a lagyu... dasan yeng alang laman ing aun a nung nu ya mikutkut ngening
