At nung sakali ding memalen tatakut la, ding kakaluguran.”
"Dapot, makamal, nanu mo ing arapat tamu?” nganang sinalabat ning gobernadorsilyo, “O ing balen, naming arapat na? Agyang nanu pang malyari ding prayli ilang maki matulid!”
"Atin lang ating matulid uling babye tamu mung babye karela ing matulid!” nganang matimid migsalitang Don Filipo. "Misan mu man dinan tayang matulid ing balen at kanita akit yu!”
Mengamus yang buntuk ing gobernadorsilyo, tinalanga ya babo at mikakunu ngana:
‘‘Yan, darala’ning mapaling daya. Balamu akalingwan yu nung nu ta karin ngeni. E yo balu ding kabalen tamu. Ding prayli mabandi la at misasanmetung la, kabang itamu kalulu tamu at misasalangsangan pa. Ale, subukan yeng ipanlwalu at akit yu nung makananu ra kong gulutan magdili-dili king kaskupan!”
"Tutu,” nganang mipnung lungkut mekibat Don Filipo, "yan ya ing malyari kabang makanyan ta pamisip, kabang ing takut bibilang tang pamingat! Gaganakan tamu ing mamamananu mung ligalig migit king kanawan a kaylangan. Ing takut yang agad daratang kekatamu at aliwa ing pamaniwala king sariling kagiwan. Balang katau mimisip ya king ikakayap nang sarili at e ro agaganaka ring aliwa at uli niti atyu kekatamu ing keynan!”
"Nung makanyan, subukan yong ganakan pamu ding aliwa muna king kekong sarili at akit yu nung makananu ra kong ibitin! E ye wari balu itang diparan kastilang: ing tune lunus magmula king kekang sarile?"
"Maya'pa sanang sinabi yung: ing kadwagan magmula king lugud king sarili at mapupus king makarine kababan,” nganang mingitngit ning tininti mayul. “Ngeni murin sabyan ku king Alkalde ing magkalag ku king katungkulan ku uling sinawa na kung megawang pyalungan at ala kung asasaupan metung man ! Lakwan da na kayu !”
At ding babai naman aliwa la sasabyan.
"Ay!” nganang mengisnawang saldak ning metung a matwang lupang mapamakalulu, "ding kayanakan makanyan la kapilan man, makanyan la ding kayana-
