"Buri keng akasabi yang kayanakan a yan!” nga ning Kagalanggalang a Kapitan Heneral king talasaup na. Dakal ku buring abalu kaya!”
'Penintun da ne pu, Kakung Heneral! Dapot keni atin pa pung metung a taung magkapilit mipakilala kekayu. Sinabi mi pu kaya king ala yang panaun ing Kamalan yu at e ko dinatang keti ban makiramdam king myayaliwang sumbung nune ba’yeng akit ing balen at ban manalbe king limbun, dapot ngana pu king ikayu e ko kukulang a panaun ban dapat king matulid.".
Mipamulala ya ing Kagalanggalang at linawe ne ing Alkalde.
“Nung e ku pu magmali,” nganang dinukung mekibat niti, "ya ing kayanakan a mika e pamikaintindi kang Padre Damaso makainggil king aral na nanding abak..
“Aliwa na naman yan? Talagang linutas na nyang prayling yan ing gulwa’ne ing lalawigan o galang ukula’nang iya ing mutus kete? Paluban ye yang taung yan!"
Ing Kapitan Heneral mwa yang balik-balik king sala. Ketang antesala karin la makapanaya ding mapilan a kastilang makasamut karing sundalus at karing mangatungkula’ning balen San Diego at ding karatig a lugal. Makalupung karing myayaliwang tapuk mipapagsalita ó mitataltalan. Karin ati’lu naman ding anggang prayli, subali kang Padre Damaso at bisa lang lungub ba’rang ibye ing puge ra.
