Itang kabengyan, inyang misindya’no ngan ding parul karing awang, linwal na king kapat a ukdu ing limbun, kabang alang patugut ing dupikal ding kumpana at ing pakbungan a pyugalyan Ing Kapitan Heneral linwal yang maglakad mu naman at kayabe no ring adwa nang bante (ayudante) i’Kapitan Tiago, ing Alkalde, ing Alperes at i'lbarra at tutukyan da la ring gwardya sibil at ding mangatungkulan a pabuklat king dalanan da at palele karing manalbe.
Ing Kapitan Heneral inanyahan deng manalbe limbun king bale ning Gobernadorsilyo at king arapa-' ning bale ating mitalakad a entabladu ban karin apawaga ra ing parangal king patulunan dang patrun.
E na na sana buring damdaman pang Ibarra ing parangal (loa)* a iti nune bisa nya mung manalbe limbun king bale nang Kapitan Tiago ba’neng akit i’Maria Clara a kayabe ra karin ding kakalugura’na, dapot ing Kapitan Heneral buri nang damdaman ing parangal a sidya ra inya mepilit yang tinuki karela at king teatro kari’nya mu pakikitan ing dalaga.
Mumuna la king limbun ding atlung munisilyus a magdala karing siryalis a pilak. Tutuki la ring anak a magaral a babantya’ning guru. Kaybat ding kayanakan a magdalang parul a myayaliwa tabas at kule at deti gewa ra la at pigugulan ding kabayangnan karing baryu. Matula lang tutupad king tungkul dang iti a binye na karela ning pekamatwa king lugal da (matanda sa nayon) at deting parul gagawan dong sinkasantingan agpang king agyu ra at maki kaputut lang kandila kilub nung makapanyawad la karing kuyug dang munisilyus
