tang makayaus pansing, at agyang i’Volapuk pa
papagkasakita'ne.
Inya é pagmulalan king i’Sisa é ne ayntindyan. Mengulurun yang bagya kile, at mipatiman yang matula at iti akakit mu king lupa na. Alang kapikakunwan é ne byasang tagalug at metung neng tune orofea.
"Hoy, ika,” ngana king metung nang utusan, "sabyan mu kanini king amanung tagalug ing magkanta ya. E na ku ayntindyan uling e byasang kastila!"
Ayntindya'ne ning mamulang ing utusan at kinta ne ing dalit ning Bengi.
Mekirandam ya pamung makatiman at maki sunu, kaybat ditak-ditak meko karing labi na ing timan, mekirandam yang mayap, kaybat minisip yang malalam. Ing siwala na at ding amanu ra ding bersu king dalit at ing dalit kabud, awsari de kapanamdaman. Mekad itang pusung e byasang lumunus at malangi mangaylangan yang uran.. Ya ayntindyan nang masalese. “Ing pagmalun, ing dimla at ing ambun a mananabung ibat banwa makabalut king ulas ning bengi,” agpang king kundiman, balamu wari mananabu mu naman king pusu na. "Ing lanta at managipus a bulaklak a migparangalan king lagu na kabang makaslag ya ing aldo, manayang puryan at mipnung degulan, kukuldas ning gatpanapun, sisisi at meko na panenayan, pipilita’nong yukyat banwa ring mangayungkung nang punlas, magpalimus ditak mu mang lilung ba'yang salikut at mate é na sana kaylyan ning sinag a menakit kaya inyang mamayagpag yang mipnung katasan, mapdan mu mang patak a ambun ban rnanangis at lumunus kaya. Ing ayup a mangapitangan, liwa'ne ing lukib na king pu’ ning dutung ba'nang linlangan ing lungkut ding kakewan...” " Tuknang ka! E na ka magkanta,” nganang minyabi ning alperesa king misnang kasalese tagalug, at saka ya tinikdo maliswas. "E na ka magkanta, susugatan da ku panamdam deng bersung den!”
Ing mamulang tinuknang ya, at ing utusan nganang mipasyo: "Aba! byasa ya palang tagalug!” at makamulala neng lalon ning babai.
I'Donya Consolation king é na sasaryan mehalata ya. Mipakarine ya dapot anti ning ing ugali na é ugaling babai, ing dine minuling mwa at sama. Tiru ne
1
