Ing lalaki anti ya mong merimlang ditak, migbalikbalik ya king sala, mengaring lasip a makakulung king metung a haula.
"Parimlan me king dalan ing buntuk mu!” ngana pang mamuysit ning babai uling balamu matibe ne pangakabat ing pasbul ning silid na.
"Susumpa kung kabud arakap daka, ing Dyos man e na na ka akit, marinat a. . .
"Wa, sabyan mu na ing buri mung sabyan.. . E mu ku buring simba, e mu ku buring tupad king tungkul ku king Dyos...!” nganang makibat mipnung sunu ning babai. King bage iti alang mipante kaya.
Ing alperes diklut ne ing kupya nang sundalus, (capacete) inayus nang bagya ing katawa'na at dambugdambug yang tinipa. Kaybat ning mapilan penandit migbalik yang alang imik. Leko no ring botas na. Ding utusan sane no king anti kaniting malilyari dapot bayu karela ing karing botas, inya milawayan la’t mikindatan.
Linukluk ya ing alperes king metung a tabureting maragul lele ning pasbul at pibata na ing menayang maygit kapitnang oras.
"Tutung tinipa ka, kambeng, o ati’ka pa ken?” nganang dusuldit kukutang ning migkulung at balang kutang aliwa ya palayo, dapot tunggal-ditak sisikaji ya siwala.
Bandang tawli, leko nong tunggal-tunggal ding kasangkapan a pinyagka na. Daramdama’na iti ning alperes at titiman ya.
"Hoy! utusan, timpa ya mg amu mo?” nganang ginulisak Donya Consolacion.
Ing utusan, king sinyal ning alperes, nganang mekibat:
"Opu, ginang, tinipa la.”
Dimdam deng meyling masaya at leko ne pangasusi ing pasbul.
Tinikdo yang pakakalale ing asawa. Mi-angat yang bagya ing pasbul. . . Metung a gulisak, ing kalabug ning katawan a miragsa, panagkasan, galeung, dugdugan, siwalang payo na. . . yan meramdam, at ninung makalarawan king milyari kilub nitang madalumdum a silid?
