Kapulu na ning bengi. Ding tawling kwitis matamad nong mumukyat king banwang madalumdum, anti mong bayung batwin, anti mu rin ding lobung papil a mumukyat mu naman king uli ning asuk at angin a mapali. Ding mapilan kareti, inabe ro karing fuegos artificiales at mesilab la at meging panganib lang malyaring manyilab karing pibalebale nung inya sa babo rang bubungan ding bale akit mo ring taung paukyat at magdala lang makabang lande a maki basan king punta at ating timbang makasadya. Mayayaninag la ring matuling dang anino king ditak a salang makaslag at balamu wari maglalage lang mananabu ibat babo ba'rang tagunan ing pamagsaya ra ding tau. Daka’la naman ding rwedang sinindyan da, kastilyu, toru, damulag a mitatau at metung a bulkan a maragul a é ra pa ikit kapilan man ding memalen San Diego.
Ngeni ring tau pupunta la ngan king plasa ba’rang alben ing tawling palage king teatro. Keni’t karin manakit kang lusis ning Bengala a babye sala at kule karing lupung-lupung a kayanakan. Ding anak naman magdala lang sulung-bulu at manintun la king dikut karetang bombang e mamakbung o aliwa pang bage malyari rang ikatula dapot ing tigtig ding musikus pepabalu rang magmula na ing palage inya ila ngan likwan de ing parang a nung nu ro sisindyan ding fuegos artificiales.
Ing maragul a entabladu masala yang masala. King balang posti makakalikat la ring sulu, ating makabitin, atin king balang suluk at king makapadurut myaliwa la kule sinag ding pasala king lugal. Kareti metung yang agwasil ing mamahala at potang lunto yang manaregla, papasyukan de at gugulisakan ding lalbe at ngara: "Oyta na... ! Oyta. ..!”
