Ing bayntau é na apansing iti at masaya nong pigayan di Maria Clara at ding kakalugura'na, at linukluk ya siping ning kapalsinta’na. I'Sinang ya mung migsalita.
"Ikit me ing bulkan a pepalage ra?” nganang kinutang.
"Ali ke, mal kung kakaluguran, uling inantabayanan ke ing Kapitan Heneral.”
"Sayarig na. . .! Ing kura abe miya at king salita na pamatakuta'na kami sasabya’no ring mengaparusan king api ban kanita e ke magsaya. E makanyan?"
Ing kura tinikdo ya at lepita’ne i'Don Filipo at mipagsalita la. Ing kura masigla yang magsalita kabang i'Don Filipo maingat at mayna ing pamanyabi na.
"Panamdaman kung tutu ing e rako apanusigan, padre,” nganang Don Filipo. "Ing Ginung Ibarra metung ya karetang minye maragul a yambag at maki matulid yang makyabe keti angga mu ring e ya babye alinlangan.”
"E pa wari alinlangan king kapayapan ing pamakisalamuha na karing mayap a kristyanu? Pepaluban me ing metung a asung kakewan (lobo) king payapang kurai. Pakibatan mu yan arap ning Dyos at karing makiyupaya! ”
"Makasadya kung makibat king nanu mang depatan kung menibat king sarili kung kaburyan, padre..." nganang Don Filipo at dinuku yang bagya, “dapot ing malati kung katungkulan e na ku dirinan upaya ban makitalamitan king pisasabya'ning pisamban. Detang é maki buri kaya é re pakisabyan at ing Ginung Ibarra é na no man pipilitan detang é bisang makisabi kaya.”
"Dapot babye kang dalan king panganib at detang mapad king panganib, king panganib la mipahamak...!”
“E ku akakit ing nanu mang panganib, Padre. Ing Alkalde at ing Kapitan Heneral kasabi reng malwat ngening gatpanapun at é masanting ata ing aku pa ing mituru karela.”
"Nung é me itabi keti, ikeng mako!”
"Panamdaman kung tutu, dapot ing ninu man e ke apalakwan keti!”
Ing kura sinisi ya king lub na, dapot tawli na.
